Истанбулдаги портлаш: 31 киши нобуд бўлди, 147 киши жароҳатланди

Туркия адлия вазири Бакир Бўздоғ маълум қилган маълумотга кўра, Истанбул шаҳридаги Отатурк халқаро аэропортида содир этилган террорчилик ҳужуми оқибатида қурбон бўлганлар сони 31 нафар, жароҳатланганлар сони 147 нафар. Бу ҳақда Haberturk телеканали Twitter саҳифасида хабар қилди.

“Ўттиз бир киши ҳалок бўлди, 147 киши яраланган”, - деди вазир. 

Аввалроқ Истанбул шаҳри губернатори Васип Шаҳин 28 нафар қурбон ҳамда 60 нафар яраланганлар тўғрисида маълум қилган эди. 

Ассошиэйтед Пресс ахборот агентлигининг юқори лавозимга эга мулозимнинг сўзларига асосланиб хабар қилишича эса, воқеа натижасида тахминан 50 нафар одам нобуд бўлган.

Дастлабки маълумотларга кўра, Истанбул аэропортидаги террорчилик ҳаракатини икки нафар террорчи гранаталарни портлатиш орқали содир этган. Кейинроқ ҳукумат вакиллари аэропортдаги ҳужумда камида тўрт киши амалга оширганини билдирди.