Ўзбекистон халқи оғир жудоликка учради. Республиканинг биринчи президенти Ислом Абдуғаниевич Каримов 78 ёшида вафот этди. Бу ҳақда бугун, 2 сентябрь куни "Ўзбекистон" телевидениеси орқали маълум қилинди.
Президентда 28 август куни қайд этилган инсульт уни ҳаётдан олиб кетди.
"Азиз ватандошлар,
Юрагимизда чуқур қайғу билан барчамиз учун қадрли бўлган Президентимиз Ислом Абдуғаниевич Каримов вафот этганини маълум қиламиз. Ислом Абдуғаниевич 2016 йил 2 сентябрда Тошкент шаҳрида бош мияда қайта тикланмайдиган ўзгаришларга ва полиорган етишмовчилигига олиб келган мия қон айланишининг ўткир бузилиши (инсульт) оқибатида вафот этди.
Мамлакатимизнинг Биринчи Президенти Ислом Каримов ҳақиқатан буюк тарихий шахс эди. Ислом Каримовнинг қатъияти ва жасорати билан республикамиз мустақилликка эришди ва ўз тараққиёт йўлида улкан муваффақиятларни қўлга киритди. Ёш давлатимиз учун ғоят мураккаб ва масъулиятли даврда вазият беқарорлашувининг олди олингани ва халқимизнинг уруш даҳшатларини кўрмасдан эсон-омон ўтиши бевосита Ислом Каримов номи билан боғлиқ.
Халқимизнинг чексиз муҳаббатини қозонган, мустақил мамлакатимизнинг Биринчи Йўлбошчиси Ислом Абдуғаниевич Каримов қалбларимизда абадий қолади ва келажак авлодлар хотирасида тинчлик, барқарорлик, фаровонлик ва тараққиёт раҳнамоси, буюк давлат арбоби сифатида мангу яшайди.
Барчамиз учун қадрли бўлган Президентимизнинг васиятига кўра, Ислом Каримов шу йил 3 сентябрда ота-онаси мангу қўним топган она шаҳри Самарқандда мусулмон урф-одатларига биноан дафн этилади.
Ўзбекистон Республикасининг Биринчи Президенти билан видолашув маросими 2016 йил 3 сентябрда Самарқанд шаҳрида бўлиб ўтади.
Биз барчамиз учун ўта оғир жудолик муносабати билан марҳумнинг оила аъзолари ва бутун Ўзбекистон халқига чуқур ҳамдардлик билдирамиз", дейилди Вазирлар Маҳкамаси томонидан тарқатилган хабарда.
Kun.uz сайти марҳумнинг яқинларига ва ўзбек халқига сабр тилайди. Унинг хотираси авлодлар хотирасида абадий қолажак.
Ўзбекистонда Ислом Каримов бошқаруви даврида бир авлод туғилди, ўсиб-улғайди, таълим-тарбия олди. Юртдаги чорак асрлик барқарорлик, бутун бир янги авлод, янгича қараш ва янги ҳаёт учун муҳтарам президентга миннатдорчилик билдирамиз.
Фироқ вақтидир, эй кўзлар, энди қон йиғланг,
Билурмисизки, бугун не кишидин айриласиз (Алишер Навоий)
