Бир ўйинда 43та гол ўтказиб юборган дарвозабон ҳибсга олинди

Германия полицияси "Фондерот" жамоаси дарвозабонини "Оберхаузен"га қарши ўйиндан кейин ҳибсга олди. Бу ҳақда Express хабар берди.

Мазкур ўйинда "Фондерот" жамоаси рақибига 0:43 ҳисобида имкониятни бой берган. Манба берган маълумотга кўра, ўйиндан бир неча кун ўтиб полиция ходимлари тўртта машинада клуб қароргоҳига ташриф буюришган ҳамда машғулотда ишлаётган дарвозабон билан гаплашган. Шундан кейин у машинага ўтириб, полиция билан жўнаб кетган.

Ҳозирда унинг қачон ҳибсдан озод қилиниши маълум эмас. "Фондерот" клуби Германия чемпионатининг 7-дивизионида иштирок этади.