Путин: БРИКС мамлакатлари босим ўтказилишини қабул қила олмайди

БРИКС мамлакатлари ўзларига нисбатан кучли босим ўтказиш ва бошқа мамлакатлар суверенитетини камситиш сиёсатини қабул қила олмайди. Бу ташкилотнинг навбатдаги саммитининг декларациясида акс этади. Россия давлат раҳбари Владимир Путин шу ҳақда маълум қилган.

«Бизларнинг халқаро майдондаги долзарб муаммолар — жумладан, Яқин Шарқдаги Сурия инқирозига барҳам бериш бўйича қарашимиз деярли бир хил. Шу боис, Гоадаги учрашув бу маънода бирон янгиликни тақдим этмайди. Барчамиз давлатлараро мулоқотнинг асосий қоидалари, биринчи галда БМТ марказий мувофиқлаштирувчи бўлган халқаро ҳуқуққа риоя этишни ёқлаймиз», — дея Путин сўзларини келтиради РИА Новости агентлиги.

Унинг таъкидлашича, Ғарбнинг қатор мамлакатлари ўзларининг бир томонлама қарашларини илгари сураётган бир вақтда, – «бундай позиция муҳим аҳамиятга эга».

Владимир Путин шунингдек, айрим мамлакатларнинг ёпиқ ва шаффоф бўлмаган лойиҳалар, яъни Трансатлантика савдо ва инвестиция ҳамкорлиги ҳамда Транстинч океани ҳамкорлиги каби ташкилотни ташкил этишга уриниши юзасидан афсус билдирган. 

«Россия БРИКСдаги ҳамкорлари сингари, ЖСТ қоидалари асосида, бошқаларни камситмайдиган очиқ иқтисодий тузилмалар барпо этиш тарафдоридир», — деб қўшимча қилган Путин.

БРИКС – Бразилия, Россия, Ҳиндистон, Хитой ва Жанубий Африка Республикасини бирлаштирувчи халқаро тузилма ҳисобланади.