Сўров: Клинтон учинчи телебаҳсда ғолиб бўлди

АҚШ президентлигига демократлар партиясидан номзод бўлмиш Ҳиллари Клинтон Лас-Вегасда ўтказилган учинчи телебаҳсларда республикачилар номзоди Дональд Трампни ортда қолдирган. Бу ҳақда CNN/ORC сўрови якунига кўра маълум қилинди.

Хабар қилинишича, сўралганларнинг 52 фоизи фикр билдиришича, Клинтон дебатларда ишонч билан сўзлаган. 39 фоиз киши Трамп устунроқ келганини қайд этган.

Лас-Вегасда ўтказилган дебат президентлик учун сайловдан олдинги охирги дебат бўлди.

Кузатувчиларнинг қайд этишича, Трампнинг нуфузи сайловчилар орасида тушиб кетган. Бунга ОАВда унинг аёлларга ёввойиларча муносабатда бўлиши ҳақидаги хабарлар эълон қилингани сабаб бўлди.

Қайд этиш керакки, CNN телеканалнинг дебатлар иккинчи раунди якунлари бўйича ўтказган сўровларига нисбатан Трамп ўзининг кўрсаткичларини бирмунча яхшилашга муваффақ бўлди. Ўшанда респондентларнинг 34 фоизи унга, 57 фоизи эса Клинтонга овоз берганди.