FT: АҚШ Украинадан Трамп режасини қабул қилишни қатъий талаб қилди

Вашингтон президент Доналд Трампнинг "тинчлик режаси"ни муҳокама қилишда "алоҳида эгилувчанлик" кўрсатиш ниятида эмас, деб билдирди АҚШ армияси вазири Дэниел Дрисколл Украина ва Европа амалдорлари, шунингдек элчилар иштирокидаги учрашувда. Тадбир жума куни, 21 ноябрда, Украинадаги АҚШ ишлари бўйича вақтинчалик вакил Жули Дэвиснинг Киевдаги резиденциясида бўлиб ўтди. Британиянинг Financial Times (FT) газетаси ёзишича, юқори мартабали европалик давлат хизматчиларидан бири учрашув руҳиятини "ўта ёмон" деб таърифлаган.

Европаликларга мурожаат қилар экан, Дрисколл ўзини оптимистик руҳда эканини айтди ва "ҳозир тинчликка эришиш вақти келди", дея таъкидлади. Шу билан бирга, вазир қўшимча қилди: "Биз (Трамп режасининг — таҳр.) тафсилотларини муҳокама қилаётганимиз йўқ". Дрисколлнинг сўзларига кўра, "АҚШ қуролли кучлари Украинани яхши кўради ва уни қўллаб-қувватлайди, аммо Америка ҳарбийларининг очиқчасига берган баҳосига кўра, Украина жуда оғир аҳволда".

Учрашувда Дэвис ҳам баёнот берди. "Қанчалик Украинага давом этаётган урушда ёрдам бермайлик, барибир чегаралар бор. <...> Шунингдек, Россия кучли саноат базасига эгалиги ҳақида жиддий асослар мавжуд, ва масала фақат вақтда — қачондир барибир Украина келишув имзолашга мажбур бўлади", — дея ундан иқтибос келтирди тадбирда иштирок этган элчилардан бири. Дрисколл билан бирга Дэвис ҳам Украина 27 ноябрга қадар "тинчлик режаси"ни қабул қилиши лозимлиги ҳақидаги Трампнинг фикрини такрорлади.

Европалик амалдорлардан бирининг сўзларига кўра, учрашувда иштирок этганлар орасида шундай таассурот пайдо бўлдики, гўё АҚШ коррупция можароси фонида Зеленскийнинг сиёсий заифлигидан фойдаланиб, тезда тинчлик келишувига эришишга уриняпти.

Қатор ЕИ мамлакатлари элчилари АҚШ режасини Россия учун стратегик ғалаба деб атай бошлади. Бунга жавобан Дэвис, FT таъкидлашича, 2022 йилда бошланган тўлиқ масштабли урушдан бери бир миллион рус аскари ҳалок бўлгани (бу АҚШ баҳоси — таҳр.) ҳолати "ғалаба" деб аталиши мумкин эмаслигини айтди.

Учрашув охирида элчилар ҳозир тинчлик келишуви тузиш ўрнига Россияга босимни кучайтириш кераклигини таъкидлади. Бу фикрга жавобан АҚШ вакиллари таклиф қилинаётган "тинчлик режаси" шартлари — Украинанинг умид қила оладиган энг яхши варианти эканини қайд этди.

Украинадаги АҚШ вакиллиги резиденциясида бўлиб ўтган учрашув Йоханнесбургдаги "катта йигирмалик" — G20 саммитига тўпланган европалик етакчилар ўртасидаги музокараларни фаоллаштирди. Учрашувларда, жумладан, Италия бош вазири Жоржа Мелони, Франция президенти Эммануэл Макрон ва Еврокомиссия раиси Урсула фон дер Ляйен ҳам иштирок этди, музокаралар кечқурунгача давом этди.

Музокаралар қатнашчилари АҚШ президентни Украинани "тинчлик режаси"ни қабул қилишига қаратилган талабларни юмшатишга кўндириш имкониятини излади. "Эндиликда Трампнинг қулоғига пичирлаётганлар жим туришни тўхтатиб, баланд овозда гапиришни бошлаши вақти келди", — деди FT билан суҳбатда муҳокамалар боришидан хабардор амалдорлардан бири.