31 октябрда Италия пойтахти Римдаги мактаблар 30 октябрда мамлакатнинг марказий қисмида юз берган зилзила сабабли ёпилади. Бу ҳақда Рим мэри Виржиния Ражи фейсбукдаги саҳифасида маълум қилди.
"Рим маъмурияти душанба куни барча ўқув масканларини зилзила оқибатида шикастланишлар олганига батафсил техник текширувдан ўтказиш учун ёпишга қарор қилди", деб ёзди Ражи.
Аввалроқ мутахассислар зилзиладан кейин Римдаги тарихий биноларнинг техник ҳолатини текширувдан ўтказишганди. Маълум қилинишича, Коллизей шикастланмаган. Вақтинчалик метро ёпилган, бироқ кейинроқ поездлар ҳаракати тикланган.
30 октябрда Италиянинг марказий қисмида маҳаллий вақт билан соат 07:40да 6,5 магнитудалик зилзила юз берди. Зилзила кучи Рим ва бошқа кўплаб шаҳарларда сезилган.
