Қўшимча функционаллар
-
Тунги кўриниш
АҚШда хусусий турмалар Трамп туфайли бойиб кетиши мумкин
Фото: © AP
Жорий йил августида АҚШ адлия вазирлиги мамлакат ҳудудида маҳбусларни сақлаш учун хусусий турмалардан фойдаланишни тўхтатмоқчи эканлигини эълон қилганди. Бу эълон ортида дунё ахлоқ-тузатиш тизимидаги энг йирик компания бўлган Corrections Corporation of America акциялари бир онда қадрсизланиб кетди ва АҚШдаги президентлик сайловларигача қадрсизланишда давом этиб келганди.
Бироқ Трампнинг ғалабасидан кейин компания акциялари нархи 40 фоизга юқорилаб кетди. Corrections Corporation of America’нинг асосий рақобатчиси GEO GROUP акциялари эса 30 фоизга қимматлашди, деб хабар бермоқда Bloomberg ахборот агентлиги.
Бундай кескин ўсишнинг сабаби шундаки, Трамп жиноятчиликка, жумладан ноқонуний муҳожирларга қарши қаттиққўллик билан курашишга ваъда берган.
"Биз жиноятчи ва судланган барчани – жиноий тўдалар аъзолари ва гиёҳвандфурушларни қўлга оламиз. Улар 2 ёки ҳаттоки 3 млн нафар бўлиши мумкин. Биз уларни мамлакатдан чиқариб юборамиз ёки турмага тиқамиз", деб айтганди Трамп ғалабасидан кейин берган интервьюсида.
Инвесторлар хусусий турмалар акциялари катта салоҳиятга эгалигини кўрмоқдалар, бироқ шу билан бирга бу борада эҳтиёткорлик аломатларини намойиш қилмоқдалар. Трампнинг бу борадаги режалари амалга ошса, ахлоқ-тузатиш муассасалари қувватларини қўшимча кенгайтириш талаб қилиниши борасида ҳозирча аниқлик йўқ.
ICE ҳисоб-китобларига кўра, айни вақтда АҚШда судланганликка эга, жумладан виза ва грин-картага эга бўлган 1,9 млн муҳожир бор.
