АПЛ. Лондон дербиси, Моуриньо - Венгер тўқнашуви ва 12-турнинг бошқа учрашувлари

Бугун қисқа танаффусдан сўнг Англия премьер-лигасининг навбатдаги тур учрашувларига старт берилади. чемпионатнинг мунтазам қарама-қаршилигига айланган Моуриньо - Венгер тўқнашуви. Лондон дербиси, пешқадамларнинг меҳмондаги ўйинлари. Бир сўз билан айтганда дунёнинг энг томошабоп чемпионати ўта қизиқ бўлган учрашувларни бизга ваъда қилмоқда. Tribuna.Uz сизларга Англиядаги уик-энднинг барча учрашувлари анонсини тақдим қилади.

19 ноябрь. 17:30 Манчестер Юнайтед (6-ўрин) - Арсенал (4-ўрин)

Кеча ҳафтанинг марказий учрашувлари ҳақидаги мақолада учрашувга батафсил тўхталиб ўтдик. 16 учрашувдан буён мағлубият нималигини билмай келаётган Арсен Венгер нобарқарор Моуриньони фаолиятида биринчи марта мағлуб эта оладими? Хуллас битта ўйиннинг ўзида ғич-ғич интрига.

20:00. Кристал Пэлас(16) - Манчестер Сити (3)

Сўнгги бешта учрашувда фақатгина бир марта ғалаба қозонган «Манчестер Сити» ўзига келиб олиш учун қисқа бўлсада танаффусга эга бўлди. Терма жамоалар иштирокидаги ўйинлар пайти Гвардиола юзага келган вазият бўйича керакли хулосаларни чиқариб олганми ёки йўқ буни бугун билиб оламиз.

Умуман «Манчестер Сити»нинг ўйинида пасайиш бўлди деб айтиб бўлмайди. Жамоа мавсум бошида бўлгани каби ҳалиям жуда кўплаб вазиятлар яратмоқда. Битта ўйиннинг ўзида бир нечта тактикалар орқали рақибларига тинчлик бераётгани йўқ. Фақат сўнгги учрашувларда вазиятлардан фойдаланиш бўйича оқсаш кузатилмоқда. Айнан мана шу жиҳат жамоанинг камида 4 очко йўқотишига сабаб бўлди. «Кристал Пэлас»да эса ишлар пачава. Алан Пардью жамоаси сўнгги бешта учрашувнинг тўрттасида имкониятни бой берди ва бир марта дуранг натижа қайд этди. 11 учрашувда 11 очко тўплаган жамоани хавфли зонадан фақатгина бир очко ажратиб турибди. Фаворитга қарши ўйинда жамоанинг имкониятлари паст баҳоланаётган бўлсада, Пардью шогирдлари ўзларига келиб олишлари учун қандай қилиб бўлса ҳам, бу учрашувда очко олишлари шарт.

20:00. Эвертон (7) - Суонси (19)

Ўтган турда «Челси»дан қақшатқич зарба қабул қилиб олган Роналд Куман шогирдлари бу турда мавсумни жуда бўш ўтказаётган «Суонси»га қарши ўтказади. «Суонси» мавсум бошидаёқ мураббийни алмаштиришга мажбур бўлди. Бироқ ақшлик Боб Брэйдли ҳам ҳозирча жамоа ўйинида сезиларли ўзгаришларни амалга ошира олмаяпти. «Челси» билан ўйнда аламзада бўлиб қолган «Эвертон»га қарши ўйин уэльсликлар учун янада мураккаб кечиши аниқ. Жамоа тўпурари Ромелу Лукакунинг юқори спорт формасига чиққанини ҳисобга олиб айтсак, Ливерпулда йирик ҳисобдаги натижани кутишга ҳақлимиз. Яна ким билади дейсиз, ахир бу ер Англия!

20:00. Саутҳемптон (10) - Ливерпуль (1)

Кўпчилик мухлислар томонидан «Ливерпуль»нинг фрам-клуби деб ҳазил остига олинадиган «Саутҳэмптон»ни бу турда жуда катта синов кутиб турибди. Етакчиларга қарши қандай ўйнашни яхши биладиган Клод Пьюэл шогирдлари, фантастик оралиқни ўтказаётган Юрген Клопп жамоасига қарши майдонга чиқади.

Ҳозирча Пьюэл жамоасининг ишларини ҳам силлиқ кечмоқда деб бўлмайди. Жамоа 10-ўринда бораётган бўлса ҳам хавфли зона билан оралиқ 3 очкони (Бу, АПЛ, болакай!) ташкил қилмоқда. Шу жиҳатдан ҳам бугунги учрашув жамоа учун муҳим. «Ливерпуль» эса «Уотфорд» билан учрашувдаги голлар ёмғиридан кейин ўта юқори кайфиятда бўлиши аниқ. Аммо жамоа етакчиси Коутиньонинг ўйинда иштирок этиши сўроқ остида қолиши жамоа учун қандайдир хавотирни пайдо қилиши мумкин. Ҳа, дарвоқе фарм-клуб мавзусига қайтсак, бугун бир йўла 4 нафар «Саутҳэмптон» собиқ футболчилари «Ливерпуль» либосида майдонга тушиши кутилмоқда.

20:00. Сток Сити(12) - Борнмут(13)

Жо Алленнинг юқори спорт формасига кириши мавсумни жуда ёмон бошлаган «Сток»нинг тез орада ўзига келиб олишига ёрдам берди. Марк Хьюз жамоаси сўнгги олти учрашувдан буён мағлубият нималигини билмай келмоқда. 3та ғалаба ва 3та дуранг қайд этган жамоа, натижада сўнгги ўриндан 12-ўринга қадар кўтарилиб олишга муваффақ бўлди. «Борнмут»да вазият бошқачароқ. Бир қарасанг жамоа рақиб дарвозасига олтиталаб гол қалаштириб ташламоқда. Шундан кейин эса шу пайтгача бирор марта ҳам ютмаган жамоага ўз уйида имкониятни бой бериб қўяди. Сўнгги икки ўйинни бой берган жамоа «Сток»ка қарши ўйиндан олдин 13-ўринни эгаллаб турибди.

20:00. Сандерленд (20) - Халл (18)

Ҳақиқий аутсайдерлар баҳси. «Сандерленд» ниҳоят 11-турга келиб мавсумдаги илк ғалабасини қўлга киритди. Дэвид Мойес шогирдлари «Борнмут» устидан меҳмонда қозонилган ғалабадан энди ўзларига келиб олишлари керак бўлади. Бунинг учун уларда жуда яхши имконият бор. Рақиб ўтган турда «Саутҳэмптон»дан устун келган бўлсада, жамоада жароҳат олган футболчиларнинг жуда кўп экани, «Ҳалл»нинг имкониятларини пасайтириб юборади.

20:00 Уотфорд (8) - Лестер (14)

Амалдаги чемпион бу мавсумни умуман барқарор ўтказа олмаяпти. Жамоа ҳали бирор марта кетма-кет бир хил натижа қайд қила олгани йўқ. Мағлубиятда ҳам, дурангда ҳам ғалабада ҳам бу кўрсаткич кузатилмаган. Варди ўтган йилги ўйинини топа олмаяпти, Маҳрез ўша биз билган Маҳрез эканини исботлай олгани йўқ. Бу эса «Уотфорд»га қўл келиши мумкин. 15 очко билан 8-ўринда бораётган Маццари шогирдлари ғалаба қозонган тақдирда юқори ўриндагиларга яқинлашиб олиш имкониятига эга бўлади.

22:30 Тоттенҳэм(5) - Вест Ҳэм(17)

Бугунги куннинг яна бир марказий учрашувларидан бири бу — Лондон дербиси. Дерби жамоаларнинг эгаллаб турган ўринларидан қатъий назар доим муросасиз кечган.

Чемпионатда мағлубият нималигини билмаган ягона жамоа бўлиб турган Маурисио Почеттино жамоаси бу кўрсаткичи билан ҳам кучли тўртликка кира олгани йўқ. Сабаби жамоа жуда кўп учрашувларда рақиблари билан очколарни бўлишиб олмоқда. Сўнгги тўртта учрашувнинг барчасида дуранг қайд этилгани ҳам сўзимизни исботлаб турибди. Славен Билич бошчилигидаги «Вест Ҳэм» эса мавсумни муваффақиятсиз ўтказмоқда. Хавфли зонадан битта ўрин юқорида турган лондонликлар отни қамчиламаса, зич тақвимдаги чемпионатнинг иккинчи қисмида жамоага жуда қийин бўлиши мумкин. Шу сабабдан жамоа учун ҳар битта учрашув жуда муҳим. Бу эса бизни қизиқарли қарама-қаршилик кутаётганини тасдиқлайди.

20 ноябрь. 21:00. Мидлсбро (15) - Челси (2)

Ўтган турда «Манчестер Сити» меҳмони бўлиб сўнгги дақиқаларда бир очко ишлаб олишга муваффақ бўлган Айтор Каранка жамоасини бу турда янада жиддийроқ синов кутмоқда. Сўнгги беш турдан бери очко йўқотиш уёқда турсин, ўз дарвозасидан бирорта ҳам тўп олиб чиқмаган (тўплар нисбати 21:0) Антонио Конте шогирдлари ғалабали юришини давом эттиришга ҳаракат қилади. Ўз навбатида «Манчестер Сити» билан ўйин тасодиф эмаслигини исботлаши зарур.

22 ноябрга ўтар кечаси. 01:00 Вест Бромвич (11) - Бёрнли (9)

Англия вақти билан душанба кунига тўғри келадиган учрашувни ҳақиқий ўртамиёналар баҳси дейиш мумкин. Турнир жадвалида ёнма-ён жойлашган икки жамоалардан қайси бири юқорироқ ўринга кўтарилиш имкониятига эга бўлишини шу ўйин кўрсатиб беради. «Бёрнли» Том Ҳитоннинг дарвозадаги қаҳрамонликлари эвазига сўнгги уч турдан буён мағлубият нималигини билмай келмоқда. «Вест Бромвич» узоқ давом этган ғалабасиз ўйинлардан кейин ўтган турда амалдаги чемпион «Лестер»ни мағлубиятга учратди. Икки яхши кайфиятдаги жамоалар тўқнашуви эътиборга молик бўлиши табиий.

Бир сўз билан айтганда, Англияда бу ҳафтада бир-биридан қизиқ бўлган қарама-қаршиликлар бизни олдинда кутмоқда. Ҳар йилгидан ҳам кўра қизиқарли ўтаётган чемпионат ўйинларини кузатишда давом этинг.

.Манба: tribuna.uz