Франция Давлат кенгаши қозоғистонлик собиқ банкирни Россияга топширишни рад этди

Франциянинг Олий маъмурий инстанцияси  — Давлат кенгаши — қозоғистонлик собиқ банкир Мухтор Аблазовни Россияга экстрадиция қилиш бўйича қарорни бекор қилди, деб хабар қилмоқда РИА «Новости» агентлиги.

Аблазов адвокатлари Давлат кенгаши қарорни маъқуллайдиган бўлса, апелляция беришларини маълум қилган эди. Апелляцияни кўриб чиқиш чоғида ҳам гумонланувчининг экстрадицияси тўхтатиб турилади. 

Аблазовнинг иши Франция Давлат кенгашида кўриб чиқилиши арафасида БМТ махсус вакили Нильс Мельцер Парижга мурожаат қилиб, банкирни топширмасликни сўраган эди. Чунки, Аблазов Россияга топширилса, у ердан Қозоғистонга экстрадиция қилиниши мумкинлиги тахмин қилинганди. 

Июль ойи ўрталарида Лион апелляция суди қозоғистонлик тадбиркор Мухтор Аблазовни ҳибсдан озод қилмаслик бўйича қарор қилган эди.