Жанубий Корея президентининг дугонаси судда айбини тан олмади

Жанубий Кореянинг истеъфога кетган президенти Пак Кин Хенинг яқин дугонаси Цой Сун Силь коррупция иши бўйича биринчи суд йиғилишида фирибгарлик ва ҳокимиятни суиистеъмол қилиш бўйича ўзига қўйилган айбловларни инкор этди, деб хабар бермоқда Reuters ахборот агентлиги. 

Цой унга қарши билдирилган барча айбловларни инкор этган. Унинг адвокати ҳам у президент Пак Кин Хе ва бошқа айбланувчилар билан тил бириктирмаганини таъкидлаган.

Цой собиқ президентнинг сиёсий ташаббусларини қўллаб-қувватлаган жамғармаларга маблағлар сармоя қилиниши мақсадида йирик компанияларга босим ўтказишда айбланмоқда.

Аввалроқ Жанубий Кореяда Силь устидан суд жараёни бошлангани маълум қилинганди.