Ўзбекистоннинг Биринчи Президенти, марҳум Ислом Каримовнинг кенжа қизи Лола Каримова-Тиллаева Лос-Анжелесда бўлиб ўтган "Олтин глобус-2017" кинофестивалининг қизил йўлакчасида намоён бўлди. Бу ҳақида CAFB.Asia'нинг Facebook'даги саҳифасида маълум қилинди.
Манбага кўра, Лола Каримова-Тиллаева "Олтин глобус" қизил йўлакчасида Tom Ford либосида кўриниш берган. Узун оқшом кўйлаги илон териси принтлари билан ишланган бўлиб, уни шарф ва оқ мўйна тўлдириб турибди.
Қизил йўлакчада Лола Каримова-Тиллаевадан ташқари кўплаб Ҳолливуд юлдузлари суратга тушишди.
"Олтин глобус" киномукофотининг 74 -тақдимот маросими 8 январдан 9 январга ўтар кечаси бўлиб ўтди.
Бугун Американинг Лос-Анжелес шаҳридаги «Беверли Ҳилтон» меҳмонхонасида «Олтин глобус» киномукофотларини топшириш маросими бўлиб ўтди.
«Олтин глобус» мукофотини «Энг яхши комедия ёки мюзикл» йўналишида «Ла-Ла Ленд» (La La Land) фильми қўлга киритди. Шунингдек, ушбу картина энг яхши режиссёрлик иши, энг яхши сценарий, мусиқа ва оригинал қўшиқ йўналишларида ҳам мукофотларга эга бўлди.
