Жанубий Корея АҚШ ва Япония билан ҳарбий машғулотлар ўтказишдан бош тортди

Жанубий Корея ҳукумати АҚШ ва Япониянинг КХДР сув ости кемаларига қарши ҳаракатларни машқ қилиш бўйича ҳарбий-денгиз кучларининг уч томонлама ҳарбий машғулотларини ўтказиш ҳақидаги таклифини рад этди. Бу ҳақда «Асахи» нашрида ёзилган.

Сув ости кемаларига қарши машғулотлар ўтказиш ғояси декабрь ойида 3 мамлакат ҳарбий идораларининг юқори мансабли вакилларининг Сеулда бўлиб ўтган маслаҳатлашувлари чоғида илгари сурилган эди.

Бундай коллектив ҳарбий машғулотлар ўтказиш ғояси ноябрь ойида Токио ва Сеул ўртасида махфий ҳарбий ахборот алмашиш тўғрисида битим имзолангани муносабати билан айтилган эди. Бу японларнинг самолётлари аниқлаган разведка маълумотлари Жанубий Корея қуролли кучларига етказилишни таъминлар эди.

Маълумотлар алмашинуви тизимини йўлга қўйиш уч томонлама машғулотлар давомида амалга оширилиш кўзда тутилганди.  Аммо Сеул уч томонлама машғулотларни Жанубий Кореянинг амалдаги президенти Пак Кин Хенинг импичменти жараёни билан боғлиқ равишда юзага келган хаос шароитида ўтказмасликни таклиф қилган. Токио билан янги ҳарбий битим тузилиши айнан президент ташаббуси эди, аммо ҳозир Жанубий Кореяда ҳокимиятдан четлатилган Пак Кин Хе билан боғлиқ ҳеч нарса қабул қилинмаяпти.

Эслатиб ўтамиз, Корея Республикаси президенти дугонаси асосий роль ўйнаган коррупцион жанжал туфайли халқ орасида ишончини йўқотди. Шундан сўнг мамлакат парламенти уни истеъфога чиқариш фойдасига овоз берди. Мазкур импичмент натижалари Конституцион судда кўриб чиқилмоқда.