Костасиз «Челси», Альбионча «класико» ва АПЛ 21-турининг бошқа учрашувлари анонси

14 январь шанба куни Англия премьер-лигаси қисқа танаффусдан кейин яна давом эттирилади. 21-тур доирасида бир қатор қизиқарли учрашувлар бўлиб ўтиши кутилмоқда.  Турнинг марказий учрашуви якшанба куни бўлиб ўтади. «Манчестер Юнайтед» ўз уйида «Ливерпуль»ни қабул қилади. Аммо бу учрашувга қадар бир қатор афишаси юқори бўлган учрашувлар бўлиб ўтади. Пешқадам «Челси» Диего Костасиз амалдаги чемпион «Лестер»га қарши, «Манчестер Сити» Куман бошчилигидаги «Эвертон»га қарши учрашувлар ва бошқа ўйинлар анонси билан Tribuna.Uz таништириб ўтади. 

ТОТТЕНҲЭМ — ВЕСТ БРОМВИЧ 17:30 (Матч! Футбол 1)

«Тоттенҳэм» сўнгги ойларда енгилмас жамоага айланди. Барча мусобақаларни қўшганда кетма-кет олтита, жумладан фантастик ғалабали серия ўтказаётган «Челси» мағлуб этилди. Бироқ «шпорлар» эҳтиёт бўлиши талаб этилади. Сабаби ўтган йили айнан «Вест Бромвич»га қарши ўйинда очко йўқотган Почеттино жамоаси амалда чемпионлик унвонини бой бериб қўйганди. Бу икки жамоа ўртасидаги сўнгги етти ўйиннинг бештаси дуранг натижа қайд қилинган.

«Тоттенҳэм»да ягона йўқотиш Эрик Ламела бўлиб турибди. «Вест Бромвич» эса жароҳати сабаб ҳимоячи Жонни Эванс хизматидан фойдалана олмайди. Крис Брант ва Жонатан Леконинг майдонга тушиши сўроқ остида қолмоқда.

ВЕСТ ҲЭМ — КРИСТАЛ ПЭЛАС 20:00

«Кристал Пэлас»нинг янги бош мураббий Сэм Эллардайс собиқ жамоаси уйига сафар уюштиради. Катта Сэм эҳтимолки, «Вест Ҳэм» ва Димитри Пайет ўртасида юзага келган вазият туфайли жамоа ички муҳити бузилганидан фойдаланиб қолишга ҳаракат қилади. Агар «бургутлар» «болғаурарлар» устидан ғалаба қозонишни истаса, АПЛда қолиш учун курашда ўзига келиб олиши мумкин бўлади. «Вест Ҳэм» ўз уйидаги сўнгги тўртта учрашувнинг бирортасида «Пэлас»ни мағлубиятга учрата олмаяпти.

«Вест Ҳэм»да асосий футболчи Димитри Пайет майдонга тушмайди, аммо Жеймс Коллинз ва Сэм Байрам сафга қайтишга улгурган. Мичейл Антонионинг иштироки эса сўроқ остида қолмоқда. «Кристал Пэлас»да кичик жароҳатдан кейин Кристиан Бентеке сафга қайтган. Уилфрид Заа ва Бакари Сако Африка кубогида иштирок этиш учун жўнаб кетишган.

УОТФОРД — МИДЛСБРО 20:00

Сўнгги беш учрашувдаги бир очко «Уотфорд» устози Вальтер Маццаррининг курсисини қимирлатиб қўйди. Агар у вазиятни тезда ўнглай олмаса, АПЛдаги бошқа омадсиз ҳамкасблари сингари ишсиз қолиши мумкин. «Мидлсбро» ғалаба қозонган тақдирда рақибига очколар бўйича етиб олиши мумкин бўлади. Жамоаларнинг сўнгги олти учрашувида «Уотфорд» бирорта ҳам учрашувда ютқазмаган.

«Уотфорд» сафида «Эвертон»дан ижарага олинган Том Клеверли майдонга тушиши кутилмоқда. Эурельо Гомес, Хосе Холебас, Хуан Суньига, Валон Бехрами ва Стефана Окака соғлиги билан боғлиқ муаммоларни ҳал қилиб олишган. «Мидлсбро»да дисквалификация туфайли Даниэль Айала ўйнай олмайди. Виктор Вальдес ва Виктор Фишер жароҳатиларидан қутулган, аммо Антонио Барраган ва Гастон Рамирес ҳозирча жамоа лазаретида қолмоқда. Шунингдек жамоанинг янги футболчиси Руди Жестед учрашувда дебют қилиши кутилмоқда.

СУОНСИ — АРСЕНАЛ 20:00 (Матч! Футбол 1)

«Арсенал» чемпионлик учун жиддий курашни давом эттиришни истаса бу учрашувда фақатгина ғалаба учун майдонга тушиши керак бўлади. «Канонирлар» учун жамоанинг ғалабаларга ташна янги мураббийи Пол Клемент халақит қилиши мумкин. «Суонси» «Арсенал»га қарши премьер-лиганинг сўнгги беш учрашувдан учтасида ғалаба қозонгани эътиборга молик.

«Суонси» ҳимоячиси Нил Тэйлор машғулотларда қўлини синдириб олган. ПСВдан сотиб олинган Лусиано Нарсингх ҳозирча жароҳатидан тўлиқ тузалгани йўқ. Учта учрашувдан кейин «Арсенал» яримҳимоячиси Месут Ўзил сафга қайтади. Эктор Беллерин ва Франсис Кокелен эса Пер Мертезакер, Киран Гиббс, Муҳаммад Элнени, Санти Касорла ва Тео Уолкотдан иборат жамоа лазаретини тўлдиришади.

САНДЕРЛЕНД — СТОК СИТИ 20:00

Мавсумни ўта ёмон бошлаган «Сток» кейинроқ бироз бўлсада ўзига келди. Аммо бу етарли бўлмаслигини Марк Хьюз яхши тушуниб туради. Англия кубогида «Вулверҳэмптон»дан учралган мағлубиятдан кейин жамоа бор эътиборини фақат АПЛга қаратишига тўғри келади. Лигада қолиш учун курашаётган «Сандерленд» эса ўз уйида бирор марта ҳам мағлуб бўлмаган рақибига қарши (6 ғалаба 2 дуранг) яна мағлуб этишга ҳаракат қилиб кўради.

«Сандерленд» лазаретини Билли Жонс ва Виктор Аничебе тарк этди. Ламин Коне, Дидье Ндонг ва Ваҳби Ҳазрилар эса Африка кубогида иштирок этиш учун жўнаб кетган. «Сток» ҳужумчиси Жонатан Уолтерс тиззасини операция қилдиришга тайёргарлик кўрмоқда. Мару Муньеса ва Фил Бардсли учрашувда иштирок эта олмайди. Рамазон Субҳи, Вильфрид Бони ва Маме Бирам Диуф Африка кубогига йўл олишган.

ҲАЛЛ СИТИ — БОРНМУТ 20:00

«Суонси» мураббийи каби бу учрашув «Ҳалл» бош мураббийи Марко Силва учун АПЛдаги дебют учрашуви бўлади.  Чемпионшипга тушиб кетиш учун асосий даъвогар сифатида кўрилаётган жамоа турнир жадвалида ўзини анча яхши ҳис қилаётган «Борнмут»дан устун келишга ҳаракат қилади. Биринчи даврада бўлиб ўтган учрашувда «Борнмут» 6:1 ҳисобида рақибдан устун келган.

«Ҳалл» бу учрашувда янги харид қилинган Эвандро ва ижарага олинган Умар Ниасс хизматидан фойдаланиши мумкин. Кёртис Дэвис, Майкл Доусон, Жош Таймон ва Жек Ливерморлар ҳам яна сафга қайтишган. «Борнмут» эса Райан Фрэйзер жароҳатдан сўнг майдонга қайтиши кутилмоқда. Жамоа сардори Саймон Фрэнсис эса ҳамон дисквалификаиця муддатини ўтамоқда. Натан Аке муддатидан олдин «Челси»га қайтди, Макс Градель эса ҳозирда Африка кубогида бўлиб турибди.

БЁРНЛИ — САУТҲЕМПТОН 20:00

Фақатгина «Челси» ва «Тоттенҳэм» бу мавсумда ўз уйидаги учрашувларда «Бёрнли»дан кўпроқ ғалаба қозонган. Жамоа уйда ва меҳмонда бутунлай икки хил жамоага айланади. Шундай экан шанба кунги учрашув «Саутҳемптон» учун қийин кечиши аниқ. Меҳмонлар АПЛнинг сўнгги уч учрашувида мағлубиятга учради, аммо лига кубогида ёмон иштирок этмаяпти. Жамоа ҳафта ўртасида «Ливерпуль»дан кичик ҳисобда устун келди. Бу икки жамоанинг сўнгги икки учрашувида эса «Саутҳемптон» ғалаба қозонган.

«Бёрнли» сафида Скотт Арфилд ва Йоханн Берг Гудмундссон майдонга туша олмаслиги мумкин. Жорж Бойд ва Жон Фланаган кичик жароҳатларидан қутулган. «Саутҳемптон» эса Стивен Дэвиснинг соғлиғи бўйича фитнес-тестдан кейин аниқ бўлади. Жозе Фонте эса ҳамон учрашувлардан четда қолмоқда.

ЛЕСТЕР — ЧЕЛСИ 22:30 (UzReport, Матч! Футбол 1)

Учрашувдан олдин «Челси»да муаммолар пайдо бўлгани ҳақида хабар жаҳон матбуоти бўйлаб тарқади. Хитойдан чиққан таклиф асосий ҳужумчи Диего Костанинг хаёлини ўғирлади. Бинойидек футбол ўйнаб юрган футболчи 30 миллион фунт стерлинг йиллик маошдан кейин лондонликлар билан ишлагиси келмай қолди. Натижада у бош мураббий Антонио Конте билан келиша олмай қолди. Бу жанжал натижасида Коста бугунги учрашувда майдонга туша олмайдиган бўлиб турибди. Бу августдан буён фақатгина ўтган турда мағлубиятга учраган жамоадаги ички муҳитга қанчалик таъсир қилишини бу учрашув кўрсатиб беради. Тўғри, «Лестер» бу икки жамоа ўртасидаги сўнгги 9 учрашувнинг фақат 1тасида ғалаба қозонган. Моуриньонинг Лондондаги фаолиятига якун ясаган ўйин ўтган мавсумда бўлиб ўтганди.

«Лестер» сафида Жейми Варди яна майдонга тушиши мумкин. Леонардо Ульоа жароҳат олган. Даниэль Амарти, Риёз Маҳрез ва Ислом Слиманилар эса Африка кубогида иштирок этиш учун жўнаб кетишган. «Челси»да Диего Костанинг ўрнини ким эгаллаши очиқ қолмоқда. Ижарадан қайтариб олинган. Натан Аке Жон Террининг ўрнини эгаллаши мумкин бўлади.

ЭВЕРТОН – МАНЧЕСТЕР СИТИ (15 январь, UzReport, Матч! Футбол 1)

Мавсумни бир текисда ўтказа олмаётган Хосеп Гвардиола шогирдлари чемпионлик учун курашиши учун қолган учрашувларда очко йўқотишга ҳаққи йўқ. Икки жамоанинг биринчи даврадаги учрашувида «Этиҳад»да тўлиқ устунлик мезбонлар тарафида бўлган эсада, «Эвертон» бир очко билан қайтишга муваффақ бўлганди.

«Манчестер Сити» Илкай Гундўғандан узоқ муддатга айрилган. Винсан Компани ва Фабиан Дельф машғулотларда иштирок этаётган бўлсада, бу учрашувда майдонга тушиши суроқ остида қолмоқда. Лерой Сане эса ўйнашга тайёр бўлиб турибди. «Эвертон» эса Умар Ниасс ва Том Клеверлини ижарага бериб юборди. Бу учрашувда жамоа ортиқча муаммоларга дуч келмаган.

МАНЧЕСТЕР ЮНАЙТЕД – ЛИВЕРПУЛЬ (UzReport, Матч! Футбол 1)

Мавсумни яхши бошлай олмаган «Манчестер Юнайтед» сўнгги олти учрашувдирки ўзига келиб олди ва максимал очко тўплади. Ниҳоят Жозе Моуриньо янги жамоасида ўйинин топиб олгандек кўринмоқда. Юрген Клопп жамоаси эса чиройли ўйин кўрсатаётган бўлсада, натижалар бир текисда кетмаяпти. Жамоа бир турда «Манчестер Сити»ни мағлубиятга учратган бўлса, кейинги турда ўртамиёна ёки аутсайдерларга қарши учрашувда очко йўқотмоқда. «Ливерпуль» ҳамон чемпионлик учун «Челси»нинг энг асосий рақобатчиси бўлиб турибди. Бу учрашувдаги ғалаба бу курашда жамоа катта ишонч бериши мумкин. Иккала жамоанинг биринчи учрашувида томонлар ўта нурсиз ўйин кўрсатиб, нурсиз дурангга имзо чекишган.

«Манчестер Юнайтед» сафида Эрик Байи майдонга туша олмайди. «Ливерпуль» таркибида эса Фелипе Коутиньо яна сафга қайтиши кутилмоқда. Садьо Мане Африка кубогида иштирок этиш учун жўнаб кетган. Қолган таркибнинг асосий футболчилари ўйинда иштирок этиши кутилмоқда.