Тожикистонда 2016 йилда 30 дан ортиқ теракт бартараф этилгани маълум қилинди

Тожикистонда 2016 йилда ИШИД каби террорчилик гуруҳлари аъзолари содир этмоқчи бўлган 36 та теракт бартараф этилгани маълум қилинди.  

Тожикистон ички ишлар вазирлиги маълумотларига кўра, 2016 йилда республикада теракт содир этмоқчи бўлган 50 дан кўпроқ кимса ҳибсга олинган.  

"Ҳукумат идоралари ва тинч аҳолига қарши содир этилмоқчи бўлган 36 та теракт бартараф этилди", деб маълум қилди Тожикистон ички ишлар вазири Рамазон Раҳимзода.

Вазирлик маълумотларига кўра, 2016 йилда мамлакатда террорчилик ташкилотларида аъзоликка гумон қилиниб 400 дан кўпроқ одам қўлга олинган. 

Раҳимзоданинг айтишича, 2016 йилда ИШИД сафига 40 одам қўшилган. Маълум қилинишича, бу миқдор 2015 йилдагидан анча камроқ бўлган. Вазир бу ҳолатни ҳокимият идоралари ва ҳуқуқ-тартибот муассасалари аҳоли ўртасида олиб бораётган профилактика ишлари билан боғламоқда.

Вазир ИИВ Сурияга олиб чиқиб кетилиб, сўнгра у ерда ўлдирилган аёллар ва эркакларнинг кўпчилигининг тақдири ҳақидаги маълумотларга эга эмаслигини айтди. "Бироқ биз билан боғланишга уддасидан чиққанлар турли йўллар билан ортга қайтарилганлар", деб қўшимча қилди вазир. 

ИИВ маълумотларига кўра, ўтган йилда Сурия ва Ироқдан 22 киши, 2015 йилда эса 80 киши қайтарилган. Террорчилик, экстремизм ва жиноий гуруҳларни ташкиллаштиришда гумон қилинган 300 га яқин киши мамлакатдан чиқариб юборилган.