Киевдаги отишма: «Москвада туғилган шахс» ўт очди ва супермаркетда одамларни гаровга олди

18 апрел куни кундузи Киев шаҳрининг Голосеевский районида қуролланган шахс кўчадаги одамларни ўққа тутди. Кейин у «Велмарт» супермаркетига югуриб кириб, у ердаги одамларни гаровга олган, деб хабар беради Украина бош прокурори Руслан Кравченко брифингда.

Супермаркет биноси ва унга ёндош кўчалар полиция томонидан ўраб олинган. Махсус топшириқли бўлинма штурм уюштирган ва отишма уюштирган шахс ўлдирилган.

Кўчада тўрт киши, супермаркетда яна бир киши олинган жароҳатлар оқибатида вафот этган. Кейинроқ шифохонага ётқизилганлардан бири ҳам жон бергани маълум бўлди. Украина президенти Володимир Зеленский шанба куни кечқурун 14 киши яралангани, улар орасида 12 ёшли бола ҳам борлигини маълум қилди. У бу якуний маълумот эмаслигини ва одамлар тиббий ёрдам сўраб мурожаат қилишда давом этаётганини қўшимча қилган.

Дастлабки хабарларда ҳужумчининг қўлида автомат бўлгани айтилганди. Аммо Украина ички ишлар вазири Игор Клименко брифингда ҳужум карабин орқали амалга оширилганини маълум қилди. «У жуда яқин масофадан битталаб ўқ узган ва одамларда тирик қолиш имкони бўлмаган. Яқинлашган ва отган. Битталаб ўқ узган, чунки бу бир тепкида бир ўқ отиладиган карабин бўлган», – деган Клименко.

ИИВ раҳбарининг сўзларига кўра, у қурол учун рухсатномага эга бўлган. «У 2025 йил декабрида тегишли органларга ундан фойдаланишга рухсат бериш сўрови билан мурожаат қилган. У тиббий маълумотнома тақдим этган. Тергов буни унга ким тақдим этганини текширмоқда», – деган вазир.

Клименконинг сўзларига кўра, штурм бошланишидан олдин «40 дақиқа» давомида жиноятчи билан музокара олиб боришга уринишган. Аммо у «ҳеч қандай жавоб қайтармаган, бунинг устига гаровдагилардан бирини ўлдирган», дея ёзади «РБК-Украина».

Украина бош прокурори Руслан Кравченко эса Голосеевский районидаги отишма «Москвада туғилган 58 ёшли шахс» томонидан уюштирилганини айтган, аммо унинг шахсини очиқламаган. ОАВ маълумотига кўра, ўт очган шахс Дмитрий Василевич Василченков бўлиб, у 1968 йил 21 апрелда Москвада туғилган ва Киевнинг Голосеевский районида яшаб келган. У кўчага одамларни отиш учун йўл олишдан олдин ўз квартирасини ёқиб юборган. У Киевга келишдан олдин Донецк областининг Бахмут шаҳрида яшаган. Василченков Украина фуқаролигига эга бўлган.

Astra сиздирилган маълумотларга асосланиб ёзишича, шундай шахсий маълумотларга эга бўлган шахс бир неча йил олдин Рязанда яшаган, 2023 йилда Россиянинг Алфа-Банкида, 2022 йилда – Сбербанкда ҳисоб рақами бўлган. 2016 йилда у Россия-Украина чегарасини уч марта кесиб ўтган – бир марта автомобилда, икки марта – поездда. 2023 йил ҳолатига унинг номи Москва соғлиқни сақлаш департаменти базасида қайд этилган.

Украинадаги «Политика Страна» телеграм-канали хабар беришича, Василченков енгил тан жароҳати етказиш бўйича жиноий жавобгарликка тортилган – 2023 йилда у бир кишини калтаклаган. Аммо 2024 йилда иш ёпилган – жабрланувчи ўз даъвосини қайтариб олган ва томонлар ярашган.

Ушбу телеграм-канал маълумотига кўра, Василченков Украина пенсия жамғармаси билан ҳам судлашган. Иш материалларига кўра, у собиқ ҳарбий бўлиб, Украинадан ҳарбий пенсия олган. Украиналик журналист Виталий Глагола аввалига Василченков – Россия армиясининг собиқ подполковниги эканини хабар қилди, аммо кейинроқ бу маълумот аниқлаштирилаётгани ҳамда фамилиялар бир хиллиги туфайли хатолик бўлган бўлиши мумкинлигини айтди.

Жиноятчининг мотивлари аниқ эмас. Украина президенти Володимир Зеленский ҳуқуқ-тартибот органлари ҳодиса бўйича бир неча версияни кўриб чиқаётганини айтди. «Жиноятчининг барча электрон қурилмалари, телефони ва барча алоқа воситалари текширилади», – дея қайд этган у.