Нью Йоркда террорчиликни режалаштиришда гумон қилинган 20 йилга қамалди

АҚШ суди Нью-Йорк штати фуқаросини 20 йиллик қамоқ жазосига маҳкум этди. У қўпорувчиликни режалаштириш ва ИШИДга моддий ёрдам берганликда айбдор деб топилган. 

ФҚБ ходимлари 26 ёшли Эмануэль Лутчманни 2015 йил 30 декабрда ҳибсга олишган эди. Тергов маълумотларига кўра, Лутчман хориждаги ИШИД аъзосидан кўрсатма олгани ва Нью Йорк штатининг Рочестер шаҳридаги бар ёки ресторанлардан бирига қуролли ҳужумни содир этишга тайёрланганини айтган. Унинг кейинги режаларига террорчилик гуруҳига қўшилиш мақсадида мамлакатни тарк этиш ҳам кирган. 

Accociated Press агентлигига кўра, адвокат сўраган муддатдан икки марта кўпроқ муҳлат қайд этилган ҳукм ўқилганидан сўнг, судланувчи округ судьяси Фрэнк Жерасига ўшқирган. 

"Сизнингча, мен қамоқхонага кетсам, менга ўхшаганлар бошқа йўқми?", — деган  Лутчман суд залида. 

Бунга жавобан, ҳакам судланувчи озодликка чиққач, кузатув остида яшаш муҳлатини 30 йилдан 50 йилга узайтирган.