Мадриднинг "Реал" жамоаси ҳамда Португалия терма жамоаси ҳужумчиси Криштиану Роналдунинг вакиллари футболчининг турк сериалидаги иштирокига оид маълумотларни рад этишди. Бу ҳақида As нашри хабар берди.
Гап шундаки, Daily Sabah нашри Роналдунинг Туркияда қўним топган суриялик оила ҳаёти ҳақидаги турк сериалида эпизодик ролни ижро этиши ҳақида хабар берганди. Манбада съёмкаларда америкалик машҳур актриса Анжелина Жолининг қатнашиши ҳам маълум қилинган.
"Бу ҳақидаги маълумот ҳақиқатга тўғри келмайди", - дейишди португалиялик футболчининг вакиллари.
Криштиану Роналду дунёнинг энг яхши футболчиларидан бири ҳисобланади. 32 ёшли португалиялик ҳужумчи ўз карьераси давомида йил якунлари бўйича тўрт маротаба "Олтин тўп" мукофотига сазовор бўлган, уч марта Чемпионлар лигасида ғолиб бўлган, шунингдек у турнир тарихидаги энг яхши тўпурар ҳисобланади. Роналду 2016 йилда Португалия терма жамоаси таркибида Европа чемпиони бўлди.
