4 февралда Жанубий Кореяда мамлакат президенти Пак Кин Хенинг истеъфоси талаб қилинган оммавий намойиш бўлиб ўтди.
Намойиш ташкилотчиларининг маълумотларига кўра, Сеул марказида кетма-кет 18-шанба ўтказилаётган бу намойишда миллионга яқин одам иштирок этган.
Кванхвамун майдонида йиғилганлар конституцион судни Пак Кин Хенинг истеъфоси бўйича ишни чўзмай, уни 13 март кунигача тасдиқлашга чақиришди. Айнан шу куни конституцион суд раисининг ваколатлари муддати тугайди.
Шу билан бирга Сеулда президент тарафдорларининг ҳам намойиши бўлиб ўтган. Бу ердаги намойишчилар импичментни бекор қилишни ва Пак Кин Хени ҳокимиятга қайтаришни талаб қилишган. Уларнинг фикрича, Пак Кин Хе истеъфоси ортида Шимолий Корея махсус хизматлари ва Жанубий Кореядаги "коммунистик унсурлар" турибди. Бу намойишда қанча одам иштирок этгани ҳақида маълумот берилмаган.
Ўтган йил декабрида Жанубий Корея парламенти депутатлари коррупция ва ҳокимиятни суистеъмол қилишда айбланган Пак Кин Хе импичментига овоз беришганди. Энди импичментни конституцион суд тасдиқлаши ёки рад этиши керак. Дастлабки маълумотларга кўра, суд ўз қарорини 10 ёки 13 мартда овоза қилиши мумкин.
