"Барселона"нинг "ПСЖ" дарвозасига урган 6-голининг нишонланиши кичик зилзилага сабаб бўлди

Чемпионлар Лигасининг 1/8 финал баҳсининг "Барселона" ва "ПСЖ" клублари ўртасидаги жавоб учрашуви сўнгида каталон клуби ўйинчиси Серхи Роберто урган голнинг мухлислар томонидан нишонланиши кичик зилзила келтириб чиқарди. Бу ҳақда "Спорт Экспресс" нашри хабар бермоқда. 

Тарихга кирган учрашув ўтган "Камп Ноу" стадиони ёнида Жауме Алмера номидаги геология институти жойлашган. Айнан унинг ходимлари зилзилани сейсмографларда қайд қилишган.

Сейсмологлардан бири Жорди Диас "Барса"нинг 2- ва 3-голларининг жўшқин нишонланиши оқибатлари ҳам сейсмографларда қайд қилинганини таъкидлаб ўтди. "Учрашув деярли якунланганда барчаси кескин ўзгарди. 6-гол институт томонидан қайд қилинган бу турдаги энг кучли зилзилага олиб келган", деб айтди олим.

Диаснинг айтишича, "Барса"нинг кейинги голлари мухлислар томонидан нисбатан осойишта қабул қилинган ва сейсмографларда из қолдирмаган.

Эслатиб ўтамиз, "Барселона" Париждаги 4:0 ҳисобидаги мағлубиятдан кейин, ўз майдонида 6:1 ҳисобидаги ғалабага эриша олди. Айнан Серхи Робертонинг учрашувнинг 95-дақиқасида урган голи "Барса"ни мусобақанинг чорак финалига олиб чиқди.