3 апрель Санкт-Петербург метросида содир этилган портлаш оқибатида 11 киши ҳалок бўлган, 45 киши жароҳатланган, деб айтилди Россия Миллий аксилтеррорчилик қўмитаси хабарида.
"Портлаш оқибатида 11 киши ҳалок бўлган, 45 жароҳатланган одам шифохонада қолмоқда. Соғлиқни сақлаш вазирлиги мутахассислари томондан портлаш оқибатида жабрланганларга ва уларнинг оила аъзоларига зарур тиббий ва руҳий ёрдам кўрсатиш бўйича чоралар кўрилган", деб айтилди хабарда.
3 апрель Москва вақти билан соат 14.30да Санкт-Петербург метросининг "Сенная площадь" ва "Технологический институт-2" станциялари ўртасидаги йўлда кетаётган метро поездида портлаш юз берган. "Площадь Восстания" станциясида қўйилган портловчи модданинг ўз вақтида аниқланиши эвазига яна бир портлаш олди олинган.
Россия тергов қўмитаси ушбу ҳодиса юзасидан "Теракт" моддаси бўйича жиноий иш қўзғатган. Таъкидланишича, тергов воқеанинг қолган версияларини ҳам текширади.
Аввалроқ "Фонтанка.ру" сайти ҳалок бўлганлар сони 14 нафар эканлигини маълум қилганди. Сайтнинг таъкидлашича, 11 киши воқеа жойида ҳалок бўлган, яна бир киши шифохонага йўлда, 2 киши шифохонада жон берган. Бироқ ҳозирча бу маълумотлар расман тасдиқланмаган.
