ОАВ: Мексикада 3 нафар жиноятчи 29 полициячини тунаб кетди

Мексиканинг Герреро штати Акапулко шаҳридан пойтахт Мехико шаҳрига кетаётган автобусга қуролли ҳужум уюштирилди. 3 нафар қуролланган жиноятчи ҳужум қилган автобусда федерал полиция ходимлари кетаётган бўлган. Бу ҳақда El Universal газетаси сайтида эълон қилинмоқда. Жиноят Морелос штатидан ўтувчи йўлда амалга оширилган.

Гап шундаки, полициячилар Мехикога ижарага олинган автобусда дам олиш учун кетишаётгани сабабли қуролсиз бўлишган. Ҳайдовчи қоронғи тушганидан кейин автобусда носозлик рўй бергани сабабли тўхташга мажбур бўлган. Яқин орадаги қуролланган жиноятчилар эса бундай қулай имкониятни қўлдан бой бермасликка қарор қилишган. Улар полициячиларнинг пуллари, мобил телефонлари ва шахсий буюмларини олиб кетишган, аммо ўзларига зарар етказишмаган. 

Айтиш жоизки, Герреро штати Institute for Economics and Peace (Иқтисодиёт ва тинчлик институти) томонидан 2016 йиилда Мексиканинг энг хавфли минтақаси, деб топилган эди. Бу ерда қотиллик жинояти ҳар 100 минг кишига 61,6 та ҳолатни ташкил этади.