ФИФА президенти Мексика жаҳон чемпионатини қабул қилишга тайёрлигига ишонч билдирди

Халқаро футбол федерацияси (ФИФА) президенти Жанни Инфантино сўнгги пайтларда мамлакатдаги хавфсизлик билан боғлиқ муаммоларга қарамай, Мексиканинг 2026 йилги Жаҳон чемпионати ўйинларини муваффақиятли ўтказиш салоҳиятига тўлиқ ишонишини айтди.

Инфантинонинг таъкидлашича, Мексика президенти Клаудия Шейнбаум билан телефон орқали мулоқотдан сўнг, мезбон мамлакатга «тўлиқ ишонч» билдирган ва режалаштирилган барча ўйинлар жадвалга мувофиқ ўтишини таъкидлаган. Мексика АҚШ ва Канада билан биргаликда финал турнирининг 13 та ўйинига мезбонлик қилади.

ФИФА раҳбарининг баёноти Мексика хавфсизлик кучларининг «Янги авлод Халиско» картели раҳбарига қарши операцияси туфайли юзага келган зўравонлик фонида янгради, бу эса бир қатор минтақаларда, жумладан, бўлажак чемпионат стадионлари жойлашган штатларда тўқнашувларга олиб келди.

Инфантино вазият назорат остида эканини таъкидлаб, Мексикадаги ўйинларни ташкил этиш «муаммосиз» ўтишига ва тарихдаги энг кенг кўламли ва инклюзив жаҳон чемпионатининг бир қисми бўлишига ишонч билдирди.

Мексика расмийлари, шунингдек, мухлислар, жамоалар ва турнир меҳмонлари хавфсизлигини таъминлаш учун барча зарур чораларни кўраётганига ишонтирди.

Эслатиб ўтамиз, Ўзбекистон миллий жамоаси тарихда биринчи марта жаҳон чемпионатида иштирок этишга тайёрланмоқда ва ўйинлардан бирини 17 июнь куни Мексика пойтахти Мехико шаҳридаги «Ацтека» стадионида Колумбияга қарши ўтказиши керак.

ЖЧ-2026 ўйинлари АҚШ, Канада ва Мексика стадионларида 11 июнь – 16 июль кунлари бўлиб ўтади.