Трамп Афғонистон президенти билан террорчиликка қарши курашни муҳокама қилди

Фото: AFP 2017 / Saul Loeb

АҚШ президенти Дональд Трамп 21 май куни Афғонистон президенти Ашраф Ғани билан учрашди, деб хабар бермоқда Оқ уй.

Учрашув АҚШ ва мусулмон давлатлари саммити бўлиб ўтган Ар-Риёдда ўтди.

"Трамп президент Ғанининг Афғонистонда террорчиликка қарши кураш ва муҳим ислоҳотларни амалга оширишдаги бошқарувчи ролини қутлади. У ўз давлати учун курашаётган афғон хавфсизлик кучларининг жасурона хизматини мақтади", дейилди Оқ уй баёнотида.

NBC телекомпанияси Пентагондаги манбага иқтибос келтирган ҳолда Афғонистондаги америкалик ҳарбийлар сонининг 5 минг кишига оширилиши мумкинлигини маълум қилганди. Охирги 4 йилда америкалик ҳарбийларнинг Афғонистондаги сони 120 мингдан 9 минггача тушиб кетган. Пентагоннинг таъкидлашича, қўшимча ҳарбийларни юбориш қарори ҳали қабул қилинмаган.