Kyodo: Малайзия Шимолий Корея фуқароларига ишлашга рухсат беришни тўхтатди

Малайзия ҳукумати февраль ўрталарида Куала-Лумпур аэропортида Шимолий Корея етакчиси Ким Чен Иннинг акаси Ким Чен Нам ўлдирилгандан кейин шимолий кореялик ишчиларга ишлашга рухсат беришни тўхтатишга қарор қилди. Бу ҳақда Малайзия ҳукуматидаги манбаларга иқтибос келтирган ҳолда Kyodo ахборот агентлиги хабар бермоқда.    

Ўша вақтда Малайзияда мингга яқин шимолий кореялик ишлаган, улар асосан кўмир шахталарида ва қурилиш майдончаларида меҳнат қилишган. Малайзия май ойида Куала-Лумпурдаги Шимолий Корея ресторани ишчиларига ишлашга рухсатни узайтириб бермагандан кейин улар мамлакатни тарк этгандилар. 

Хорижга ишчиларни юбориш Шимолий Корея учун хорижий валюта тушумининг асосий манбаларидан бири ҳисобланади. Жанубий Корея ҳукуматида таъкидланишича, Хитойнинг ўзида 90 минг шимолий кореялик ишчи ишлайди, улар Шимолий Корея бюджети учун ҳар йили юзлаб миллион доллар фойда келтиради. Тахмин қилинишича, бу маблағларнинг бир қисми Шимолий Кореянинг ракета-ядровий дастури учун ишлатилиши мумкин.   

Ким Чен Нам ўлимигача Малайзия ва Шимолий Корея яхши муносабатларни сақлаб келаётгандилар, бироқ воқеадан кейин улар ўртасидаги муносабатлар кескин ёмонлашган. Пхеньян ва Куала-Лумпур ўз элчиларини чақиртириб олишган ҳамда Малайзия фуқароларининг Шимолий Кореяга ва Шимолий Корея фуқароларининг Малайзияга киришини тақиқлаб қўйишган.