Ҳамбургдаги норозилик намойишларида 70дан ортиқ полициячи жабрланди

Фото: Kai Pfaffenbach/Reuters

Германиянинг Ҳамбург шаҳрида намойишчиларнинг полиция ходимлари билан тўқнашувлари оқибатида 74 полициячи жабрланди. Бу ҳақда шаҳар ҳуқуқни муҳофаза қилиш органининг Twitter саҳифасида хабар қилинган.

Бошқарма биринчи хабарда 15 нафар ходими жабрлангани ҳақида хабар қилган эди. Улардан 3 нафари шифохонага ҳам ётқизилган. Алалоқибат, жароҳат олган полициячилар сони ортди.

«Ҳуқуқ-тартибот идорасининг яна 59 хизматчиси жабрлангани ҳақида хабар қилинмоқда. Намойишчилардан неча киши жароҳатлангани ҳақида маълумотлар йўқ», — дейилади хабарда.

Сўнгги маълумотларга кўра, Ҳамбургдаги G20 саммити арафасида 8 минг киши намойишларда иштирок этмоқда.

Тайёрлаган Толиб Раҳматов

#G20 саммити #Ҳамбург

7-8 июль кунлари Германиянинг Ҳамбург шаҳрида G20 саммити бўлиб ўтади. Ҳар йили ўтказиладиган саммитда «Катта йигирматалик» давлатлари раҳбарлари халқаро кун тартибидаги масалаларни муҳокама қилишади