Мўғулистонда иккинчи тур президентлик сайловлари бошланди

Мўғулистонда иккинчи тур президентлик сайловларида овоз бериш бошланди, деб хабар қилмоқда Монцамэ агентлиги.

Дастлаб, ҳал қилувчи турни 9 июлда ўтказиш режалаштирилган эди. Бироқ, спорт байрами муносабати билан овоз бериш куни 2 кунга олдинга сурилган. 

Эслатиб ўтамиз, биринчи тур сайловларда давлат раҳбарлиги учун 3 нафар номзоднинг ҳеч бири 50 фоиздан кўп овоз тўплай олмаган эди. 

Демократик партия номзоди Халтмаагийн Баттулга биринчи турда 38 фоиз овоз тўплаб, мамлакат парламентининг амалдаги спикери, Мўғул халқ партияси етакчиси Миеэгомбына Энхболдани ортда қолдирган эди. 

Бугун 7 июль кунги сайловда ушбу икки номзоддан бирини танлашга тўғри келади. 

Мўғулистондаги президентлик сайловлари 7-маротаба ташкил этилмоқда. Ҳозирги давлат раҳбари, Демократик партия вакили Цахиагийн Элбэгдорж икки муддат президент бўлгани сабабли қайта сайлана олмайди.