АҚШ президенти Доналд Трамп ва Россия президенти Владимир Путин Сурия жануби-ғарбида ўт очишни тўхтатиш бўйича келишувга эришган. Бу ҳақда америкалик амалдорларга асосланган ҳолда Associated Press хабар тарқатди.
Агентлик хабарида қайд этилишича, бундай келишув Суриядаги фуқаролик уруши якуни бўйича уринишларнинг янги босқичига олиб чиқади.
Шу билан биргаликда манбалар келишувнинг жиҳатларини ва бу келишув қандай амалга оширилишини келтириб ўтмаган.
Манбанинг сўзларига кўра, ўт очишни тўхтатиш бўйича сулҳ 9 июль куни Дамашқ вақти билан соат 12:00дан (Тошкент вақти билан соат 14:00) кучга киради.
Манбалардан бири Иордания ва Исроил ушбу келишувда иштирок этишини айтган. Қайд этилишича, АҚШ иттифоқчилари бўлган бу икки давлат Сурия билан чегараларида ҳарбийлари сонини оширганди.
Саммит арафасида АҚШ Сурия масаласида янги режа тайёрлагани, унга кўра, Башар Асад ҳукуматдан кетиши шарт бўлмаслиги ҳақида хабарлар тарқалганди.