Хитойлик аёл кредитни тўламаслик учун пластик жарроҳлик столига ётди

Хитойнинг Хубэй вилоятида яшовчи аёл 25 млн юань (3,7 млн доллар) миқдоридаги кредитни тўламаслик учун пластик амалиётини ўтказиб,ташқи кўринишини ўзгартирди, деб хабар қилмоқда Синьхуа агентлиги.

Хубэй вилояти Ухань шаҳри судининг қароридан сўнг, 59 ёшли Чжу Нацзюань пластик амалиётини ўтказиб, номаълум томонга ғойиб бўлган. 

Агентлик маълумотларига кўра, у июль ойида Шэньчжэнь шаҳрида бошқа шахс номига темир йўл чиптасини харид қилаётган вақтда ушланган. Қайд этилишича, полиция ходимлари уни ушлашга келишганида, гумондорнинг ўзига ўхшамаслигидан ажабланишган. Ҳуқуқ-тартибот идораси ходимининг айтишича, "у 30-40 ёшли аёлга ўхшаган".

Сўнгги вақтларда Ухань шаҳри ҳукумати кредитларни тўламайдиганларга қарши жиддий кураш олиб бора бошлаган. Йилнинг биринчи ярим йиллигида шаҳарда 186 киши кредитларини тўламаслик айблови билан ушланган.