Мьянма ҳукумати БМТ инспекторларини Араканга қўймади

Мьянма ҳукумати БМТнинг Инсон ҳуқуқлари кенгаши инспекторларини Аракандаги вазиятни ўрганишга қўймади. Бу ҳақида БМТнинг инсон ҳуқуқлари бўйича олий комиссари Зайд Раад Ал-Ҳусайннинг сўзларига асосланиб, "Анадолу" агентлиги хабар берди. 

Зайд Раад Ал-Ҳусайннинг сўзларига кўра, Аракандаги вазият ўқув дарсликларидаги этник тозалаш тушунчасини ёдга солади. 

Мьянма шимолидаги Аракан штатида яшовчи мусулмонларга ҳужумлар 25 августдан кучайди ва улар оммага "қуролланган жангариларга қарши кураш" сифатида келтирилмоқда. Минтақадаги гуманитар вазият кескин ёмонлашган. Бангладешга қочган араканликлар сони 290 мингга етди. 

Европа мусулмон-роҳингялар кенгаши матбуот котиби Анита Шугнинг маълум қилишича, Аракан штатида уч кун ичида ҳарбийлар ва буддистлар ҳужумлари натижасида 2-3 минг мусулмон ҳалок бўлган.