Германияда 2017 йилда терроризмга доир 900 иш қўзғатилди

Германияда 2017 йилнинг январидан бошлаб терроризм билан боғлиқ 900 иш қўзғатилди. Уларнинг аксарияти - 800га яқини ислом дини билан ниқобланган жиноий ишлар, қолгани эса - чап ёки ўнг радикал асосга эга. Бу ҳақида Германиянинг Die Welt газетаси мамлакат Бош прокуратурасига асосланиб хабар берди. 

Шунингдек мамлакатда статистиканинг сезиларли даражада ошиши кузатилган - 2016 йилда ГФРда террористик фаолиятга доир 250 иш қўзғатилган. 

"Адлия органлари исломни ниқоб қилганларга жазо белгилаш учун турли ҳуқуқий имкониятларга эга, - деди Германия либерал-демократик партиясининг раис ўринбосари Вольфганг Кубикки. - Бироқ адлия органларининг жуда бандлиги сабаб бизга ҳам прокуратура органларида, ҳам судларда кўпроқ ходимлар талаб қилинади. Агар экстремистлар Германия фуқароси бўлмаса, уларни мамлакатдан депортация қилиш мажбурий чора бўлиши керак".