ФИФАдаги коррупция иши бўйича ўз айбини тан олган, Гватемала футбол федерациясининг собиқ бош котиби Эктор Трухильо АҚШда 8 ойга озодликдан маҳрум этилди. Бу ҳақда Associated press ахборот агентлиги хабар бермоқда.
Суд йиғилиши Нью-Йоркнинг Бруклин тумани федерал судида бўлиб ўтган. 63 ёшли Трухильо ФИФАдаги коррупция иши бўйича АҚШда судланган илк айбланувчи бўлди.
Собиқ амалдор 2018 ва 2022 йиллардаги жаҳон чемпионати учун маркетинг ҳуқуқлари учун турли шахслардан 175 минг евро миқдорида пора олганини тан олган. Дастлаб Трухильога 20 йил озодликдан маҳрум бўлиши хавф солаётганди. У тергов билан ҳамкорлик қилишга қарор қилиб, айбини тан олгандан кейин, прокуратура унга уч йилдан кам бўлмаган қамоқ жазоси берилишига рози бўлган. Бириоқ суд охир-оқибат собиқ амалдорга юмшоқроқ жазо ҳукмини чиқарган.
ФИФА тарихидаги энг йирик можаро 2015 йил 27 майида Цюрихда ташкилотнинг юқори лавозимли мансабдор шахслари, жумладан ФИФАни ривожлантириш бўйича собиқ директори, Никарагуа футбол федерациясининг собиқ президенти Хулио Роча, ФИФА вице-президенти Эухенио Фигередо, ФИФА ижроия қўмитаси аъзоси Эдуардо Ли, Бразилия футбол конфедерациясининг собиқ президенти Хосе Мария Марин, Венесуэла футбол федерациясининг президенти Рафаэль Эскевель қўлга олингандан кейин авж олган.
Ўшанда ҳаммаси бўлиб ФИФАнинг 14 нафар амалдаги ва собиқ мансабдор шахсларига айблов билдирилган. АҚШ адлия вазирлиги маълумотларига кўра, гумонланувчилар 24 йил ичида 150 млн доллардан кўпроқ қийматдаги пора олишган. Цюрихда 3 декабрда яна ҳибсга олишлар бўлиб ўтган. Унда КОНКАКАФ’нинг собиқ президенти, ФИФАнинг собиқ вице-президенти Альфред Хавит, КОНМЕБОЛ раҳбари ва ФИФА вице-президенти, парагвайлик Хуан Анхель Напоут ҳибсга олинганлар. ФИФАдаги коррупци иши бўйича ҳаммаси бўлиб 42 киши ўтмоқда.
