АҚШ чегара-божхона хизмати футбол бўйича жаҳон чемпионати ўйинларида ишлаши керак бўлган сомалилик ҳакам Умар Артанни мамлакатга киритмади. Натижада у АҚШдан ташқари Шимолий Американинг яна икки давлати – Канада ва Мексикада ҳам бўлиб ўтадиган турнир ўйинларини бошқара олмайдиган бўлди.
Сомалилик ҳакам 6 июн куни Истанбулдан Майами халқаро аэропортига етиб келганди. АҚШ Чегара-божхона хизмати хабарида унинг шахсини ошкор қилинмаган, бироқ турнирда Сомалидан фақат битта ҳакам – Умар Артан иштирок этиши керак эди.
ФИФА ушбу ҳолат бўйича изоҳ бериб, қабул қилувчи давлатнинг миграция ва виза масалаларига аралаша олмаслигини маълум қилди.
«ФИФА мезбон мамлакатнинг иммиграция тартиб-таомилларида, жумладан виза масалаларида иштирок этмайди. Ваколатли идоралар бизга жаноб Артаннинг мақоми ҳозирча қайта кўриб чиқилмаслигини маълум қилди», – деди федерация вакили.
АҚШ Божхона ва чегара хизмати ҳам бу воқеани тасдиқлаган. Бироқ идора баёнотида мамлакатга кириш рад этилгани сабаблари келтирилмаган.
Умар Артан эса рўй берган воқеага қарамай, фаолиятини давом эттириш ниятида эканини билдирди. У ўзини қўллаб-қувватлаган футбол жамоатчилигига миннатдорлик изҳор қилди ва ҳамкасбларига жаҳон чемпионатида омад тилади.
«Қўллаб-қувватлов сўзлари учун футбол оиласига раҳмат айтаман. Ҳамкасбларимга жаҳон чемпионатида муваффақият тилайман ва келажакдаги турнирларда улар сафига яна қўшилишга умид қиламан», –деди Артан.
Умар Артан Африка футбол конфедерацияси (CAF) томонидан 2025 йилнинг энг яхши ҳаками деб эътироф этилган эди. У жаҳон чемпионати финал босқичи ўйинларига жалб қилинган биринчи сомалилик рефери сифатида ҳам тарихга кирган.
Кузатувчилар фикрича, мазкур қарор спорт ва миграция сиёсати кесишган нуқтада юзага келган баҳсли ҳолатлардан бири бўлиб, жаҳон чемпионати олдидан катта муҳокамаларга сабаб бўлиши мумкин.
