Неймар ва «Барса» уруши давом этади. Футболчининг агенти каталонларнинг қўрқинчли қисматини башорат қилди

«Барселона»нинг собиқ футболчиси, ҳозирда «ПСЖ» шарафини ҳимоя қилаётган Неймарнинг агенти Вагнер Рибейро Каталониядаги воқеаларга муносабат билдирди. Каталония ҳукумати 27 октябрь куни Испаниядан мустақиллик эълон қилганди.

«Каталония Испаниядан ажралиб чиқса Люксембургга айланади, «Барселона» эса йўқликка сингади», – дея ёзган Рибейро ўз твиттерида.

Жума куни Каталония парламенти 1 октябрь куни ўтказилган референдум натижалари асосида мустақиллик декларацияси эълон қилгач, Испания ҳукумати бу ҳудуддан мухторият мақомини олиб қўйиш ҳаракатларини бошлади.

«Барселона» клуби эса бу вазият бўйича баёнот бермаяпти. Клуб президенти Хосеп Бартомеу «Барселона» Каталония ҳукумати томонида туришини, лекин бу ҳаракатларни қўллаб-қувватламаслигини айтган. У томонларни мулоқотга чақирган.