Руминиялик боксчи Хаммер Александр Поветкин билан жанг ўтказишга шартнома имзолади

Руминиялик боксчи Кристиан Хаммер россиялик боксчи Александр Поветкин билан жанг ўтказишга шартнома имзолади. Бу ҳақда RCC Boxing Promotion промоутерлик компанияси ижрочи директори Алексей Титовга иқтибос келтирган ҳолда ТАСС ахборот агентлиги хабар бермоқда.  

Боксчилар ўртасидаги жанг жорий йилнинг 15 декабрида Екатеринбургда бўлиб ўтади. Жанг ғолиби янги зеландиялик Жозеф Паркерга тегишли бўлган WBO чемпионлик қамари учун жанг ўтказиш ҳуқуқини қўлга киритади.

Кристиан Хаммер профессионал боксчи сифатида 26 та жанг ўтказган бўлиб, улардан 22 тасида ғалаба қилган, 4 тасини мағлубият билан якунлаган. 

Поветкиннинг ҳисобида эса 33 та жангдан 32 та ғалаба ва битта мағлубият бор.