Екатеринбургда ташлаб кетилган ўзбекистонлик чақалоқ ватанга қайтарилди

Ўзбекистоннинг Екатеринбург шаҳридаги Бош консулхонаси дипломатлари Россияда онаси томонидан ташлаб кетилган янги туғилган ўзбекистонлик чақалоқни ватанга қайтариш учун зарур чораларни кўриб, она ва боланинг “Екатеринбург–Тошкент” йўналиши бўйича юртга қайтишига кўмаклашди.

Фото: Дунё

“Дунё” АА хабарига кўра, Бош консулхонага Свердловск шаҳридаги 1-шаҳар болалар клиникаси вакиллари мурожаат қилиб, Ўзбекистон фуқароси Х.С. ўз чақалоғини ташлаб кетгани ҳақида маълум қилган.

Маълум бўлишича, она аввалроқ шифокорларга жуда заиф туғилган ва махсус вакуумга жойлаштирилган чақалоғидан воз кечишини билдирган. Орадан уч кун ўтгач эса у гўдагини ташлаб, ўзи шифохонадан чиқиб кетган.

Дипломатлар ватандошни топиб, болани ватанга қайтариш зарурлиги юзасидан профилактик суҳбат ўтказган. Шунингдек, улар чақалоқни рўйхатдан ўтказиб, она ва бола учун барча зарур ҳужжатларни бепул расмийлаштирган.

Қайд этилишича, Россиянинг ушбу ҳудудида тадбиркорлик билан шуғулланаётган ватандошлар кўмагида клиникадаги тиббий хизматлар тўлови ҳал этилган.

Шунингдек, Ўзбекистон Миграция жамғармаси маблағлари ҳисобидан она ва болага “Екатеринбург–Тошкент” йўналиши бўйича авиачипталар харид қилиниб, улар юртга қайтиши учун рейсга кузатиб қўйилган.

Тайёрлаган: Отабек Матназаров

#чақалоқ #Екатеринбург