Иссиқ ва қурғоқчил иқлимга эга бўлган Саудия Арабистонида жорий қиш ноодатий совуқ келиши кутилмоқда. Маҳаллий об-ҳаво мутахассисларининг таъкидлашларича, ҳаво ҳарорати -5 градус совуққача тушиб кетиши мумкин.
“Қироллик ҳудудида қишда ҳаво ҳарорати -5 градус совуққача тушиб кетиши мумкин. Энг совуқ ҳаво Саудия Арабистони шимолида бўлади”, деб маълум қилди Саудия Арабистони метеорологик хизмати ижтимоий тармоқдаги саҳифасида.
Жорий ҳафтада қиролликда кучли ёмғирлар ёғишни бошлади: дастлаб ёмғир мамлакатнинг ғарбида, 23 ноябрдан эса марказий қисмидаги Ар-Риёдда ёғишни бошлаган. Ҳафта бошидан шунчалик кўп миқдорда ёмғир ёғганки, қиролликнинг йириклиги бўйича иккинчи шаҳри – Жиддада барча асосий трассалар ва туннеллар сув остида қолган.
Ўтган йил қишида Арабистон яримороли давлатлари бу жойлар учун ноодатий табиий ҳодиса – қорнинг ёғиши гувоҳи бўлгандилар. Ўтган қишда қор Саудия Арабистонининг шимолидаги баъзи ҳудудлар, Уммон султонлиги ва БААда кузатилган.
