Туркия иқтисодиёти ўсиши бўйича дунёда етакчилик қилмоқда

Туркия иқтисодиёти 2017 йил 3-чорагида 11,1 фоизлик ўсишни кўрсатиб, Европа, G20 (Катта йигирматалик) ва Иқтисодий ҳамкорлик ва тараққиёт ташкилоти (ИҲТТ) давлатлари орасида 1-ўринни эгаллади.

“Анадолу” ахборот агентлигининг Туркия статистика институти, Европа Иттифоқи статистика хизмати ва ИҲТТ маълумотларига таяниб маълум қилишича, Туркия иқтисодиёти 2017 йил 3-чорагида ўтган йилнинг шу чорагига нисбатан 11,1 фоиз ўсган. 

Европа Иттифоқи давлатларида 2-чоракда иқтисодий ўсиш 2,1 фоизни, 3-чоракда 2,5 фоизни ташкил қилган.   

Кўриниб тургандек, Туркия иқтисодиёти Европа иттифоқи давлатларига нисбатан 4 марта каттароқ ўсишни кўрсатган.

Европа давлатлари орасида кўрилаётган давр ичида энг катта иқтисодий ўсишни Руминия (8,8 фоиз), Мальта (7,2) ва Латвия (5,8) намойиш қилган. 3-чоракда Германия иқтисодиёти ўсиши 2,3 фоизни, Буюк Британияники 2,1, Францияники 2 фоизни ташкил қилган.

G20 давлатлари орасидан Хитойнинг иқтисодиёти ўсиши 6,8 фоизни, Ҳиндистонники 6,1 фоизни ташкил қилди. 

Туркия президенти Ражаб Тоййиб Эрдўған мамлакатнинг иқтисодий ютуқлари ва Яқин Шарқдаги вазиятга изоҳ бериб ўтди.

Жумладан, Эрдўған Туркия ялпи ички маҳсулоти ўсиши Туркияни кучсиз қилиб кўрсатмоқчи бўлган, Анқаранинг ички ва ташқи душманларига энг яхши жавобдир, деб айтди. 

Унинг таъкидлашича, Туркия иқтисодиётига пул тиккан бирор-бир сармоячи аввал ҳам пушаймон қилмаган ва келгусида ҳам пушаймон қилмайди.

Эрдўған, шунингдек, Анқаранинг гуманитар соҳадаги сиёсатига эътибор қаратди. “Агар дунёда қочқинларни қўллаб-қувватлаш бўйича мукофот таъсис этилса, унда бу мукофотни олишга Туркиянинг ҳаққи барчадан кўра кўпроқ бўлади”, деб айтган Эрдўған.    

Эрдўған Яқин Шарқдаги  охирги воқеаларга ҳам тўхталиб ўтди. “Бугун ўзини Ал-Қудснинг эгалари деб ҳисоблаётганлар шуни билишлари керак-ки, эртага улар яширинишлари мумкин бўлган дарахтни қидиришга тушиб қолишлари мумкин”, деб ўз сўзларини давом эттирган Эрдўған. 

Туркия етакчисининг айтишича, “Ал-Қудсни мусулмонлар ва бошқа динлар вакиллари учун очиқ осмон остидаги турмага айлантирганлар, қўлларидан ҳеч қачон қонни ювиб ташлай олмайдилар”.