Ортиқча вазнга эга қайсар аёл ванна ичида ўлим топди

Фото: Fotolia / Jeka84

Германияда яшовчи 145 кг вазнга эга аёл ваннага йиқилиб кетиб, унинг ичидан 10 кун давомида чиқа олмаган. Бу ҳақда Daily Mirror нашри хабар бермоқда.

Воқеа Беккум шаҳрида юз берган. Аёлнинг эрининг айтишича, у ваннахонада шовқинни эшитгач, нима бўлаётганини билгани у ерга ошиққан. У бу ерда рафиқаси ванна ичидаги сувга йиқилиб кетиб, уни ичида тиқилиб қолганини кўрган. Эркакнинг айтишича, у рафиқасига ёрдам бермоқчи бўлган. Бироқ аёл эрига ундан ҳеч нарса керакмаслигини айтган.

Эркакнинг таъкидлашича, шундан кейин у рафиқасига мобил телефон келтириб, “Агар ёрдам керак бўлса, ўзинг чақирарсан. Менинг ёрдамимни барибир истамаяпсан” деб айтган. Эркакнинг таъкидлашича, унинг рафиқаси ванна ичида планшет ўйнаб ётган. Бу орада эркак унга овқат, ичимликлар, дорилар ва газеталар келтириб турган.

Тахминан 10 кундан кейин эркак тез ёрдамни чақиртиришига тўғри келган. Шифокорлар аёл улар келишларидан камида икки кун олдин ўлиб бўлганини аниқлашган. Шифокорларнинг айтишича, у шамоллашдан вафот этган.

Эркак рафиқасининг ўлимига олиб келган ҳаракатсизликда айбланиб, ҳибсга олинган. У ўз айбини тан олмаяпти. Шунга қарамай, у январда суд қилинади.