BMW Чехияда электромобиллар учун 100 млн долларлик синов трассасини қурмоқчи

BMW компанияси ҳайдовчисиз автомобиллар ва электромобиллар синаладиган полигон қуриш учун 100 млн доллардан кўпроқ маблағ сарфлайди. Мажмуа Чехиянинг Германия билан чегараси яқинидаги Соколов шаҳрида 500 гектарлик майдонда, BMW Group’нинг истиқболли тадқиқотлар маркази яқинида қурилади. Синов трассаси 2020 йилдан ишлашни бошлаши кутилмоқда.

Компанияда таъкидланишича, BMW’нинг Мюнхен яқинидаги, Франция ва Швециядаги амалдаги синов трассалари электр ва ҳайдовчисиз автомобилларни синаш талабларига жавоб бермайди.

Айни вақтда Чехия ҳукумати ва BMW Group ушбу лойиҳа юзасидан ҳамкорлик ҳақидаги келишувни тайёрлашмоқда. BMW’нинг Шарқий Европадаги илк синов трассаси маҳаллий аҳоли учун бир неча юз янги иш ўрни яратади ва компанияга маблағларни тежашга имкон беради, чунки Чехияда объектни қуриш ва унга хизмат кўрсатиш Германиядагидан арзонроққа тушади. 

Полигонни қуриш лойиҳаси компаниянинг 2025 йилгача ҳайдовчисиз, гибрид автомобиллари ва электромобиллари қаторини ривожлантириш режасининг бир қисми ҳисобланади. Маълум қилинишича, марка бу вақт ичида 25 та янги модел ишлаб чиқаради, улардан ярми тўлиқ электр двигателлар билан жиҳозланади. Компаниянинг биринчи ҳайдовчисиз машинаси – iNEXT 2021 йилда пайдо бўлади. 

BMW’нинг бўлғуси электрокарлари негизида HEAT (High-integrated Electric Drivetrain) архитектураси ётади. Бу архитектура электромотор, узатмалар қутиси ва электрон компонентларни бир алюминий блокига бирлаштиришни кўзда тутади.