Эркак дафн қилингандан кейин 7 ой ўтгач уйига келди

Таиландда 44 ёшли Сакхон Сачива балиқ овловчи кемадаги бир неча ойлик вахтадан кейин уйига қайтгач, оиласи уни ўлган деб ҳисоблаб, 7 ой олдин кремация қилганидан хабар топди.

Сачива 16 декабрда Сисакет вилоятидаги уйига қайтгач, унинг қариндошларига 2017 йил май ойида номаълум эркакнинг жасади топширилганидан хабар топди. Жасад Бангкок яқинидаги ижарага бериладиган уйлардан бирида топилган. 

Жасад чириган ҳолатда бўлган, унда сурати бўлмаган, шахсни тасдиқловчи гувоҳнома, турар манзили бўйича рўйхатдан ўтгани ҳақидаги ҳужжат нусхаси, шунингдек, Сачива номига гувоҳнома бўлган. Аниқланишича, эркак ошқозон-ичак яллиғланишидан вафот этган. 

Полиция Сачива яқинлари билан боғланиб, уларга жасадни топширган. Жасад кремация қилинган. Сачива онасига боқувчисининг вафоти муносабати билан 90 минг бат (3 минг доллар) товон пули тўланган.

Сачива уйда пайдо бўлгандан кейин ҳуқуқ-тартибот идоралари тергов бошлашган. Аниқланишича, Сачиванинг ҳужжатлари ўғирлаб кетилган. Эркак бу ҳақда ўз вақтида ариза берган. Кўринишича, топилган марҳум Сачивадан ўғирланган ҳужжатлар билан яшаган.

Сачива яқинларининг айтишича, улар жасадни ўликхонадан олишаётганда марҳумнинг тишлари Сачиваникидан бошқачалигига эътибор қаратишган. Бироқ ўликхона ходимлари жасад таниб бўлмайдиган даражада чириб кетганини айтиб, эркакнинг оиласини тегишли маросимларни ўтказиш учун жасадни тезроқ олиб кетишга кўндиришган.