Девор ошиб ўғирликка тушган ва 8 млн сўмни ўмарган шахс ушланди

Янгийўл туман ИИБга уй бекаси, 1976 йилда туғилган Жамила Шодиева (келтирилган исм-фамилиялар ўзгартирилган) ариза билан мурожаат қилиб, номаълум шахс, девордан ошиб тушиш йўли билан кириб, уйидаги сумкасидан саккиз миллион сўм пулини ва HUAWEI Y3 русумли уяли телефон аппаратини ўғирлаганлигини маълум қилган. Бу ҳақда Тошкент вилояти ИИБ ахборот хизмати хабар берди.

Олиб борилган тезкор чора-тадбирлар натижасида ушбу жиноятни 1992 йилда туғилган Ғулом Валиев содир этганлиги аниқланиб, ушланди. 

Ушбу ҳолат юзасидан унга нисбатан Ўзбекистон Республикаси Жиноят Кодексининг 169-моддаси 2-қисми билан жиноят иши қўзғатилди. Терговни ИИБ олиб бормоқда.