"Ўзтўқимачиликсаноат" Ассоциациясига аъзо корхоналар баъзи божхона тўловларидан озод қилинади

Бугунги кунга келиб, Ўзбекистонда улкан ишлаб чиқариш салоҳиятига эга бўлган тўқимачилик саноати шакллантирилган бўлиб, унинг тизимида қарийб 7 мингга яқин корхона самарали фаолият юритмоқда. Шунингдек 1,4 миллион тонна ҳажмда пахта толасини ишлаб чиқаришга мўлжалланган қувватлар яратилган. Ушбу хомашёнинг қарийб 60 фоизи мамлакатимиз тўқимачилик корхоналарининг эҳтиёжларини қондиришга ишлатилмоқда. KUN.UZ мухбири 28 декабрь куни Тошкент тўқимачилик ва енгил саноат институтида тўқимачилик ва тикиш-трикотаж саноатининг жадал ривожланишига бағишланган матбуот анжуманида берилган маълумотларга асосланиб, шу ҳақида хабар берди. 

Аввал "Ўзбекенгилсаноат" АЖ таркибига атиги 436 ташкилот кирган бўлса, эндиликда "Ўзтўқимачиликсаноат" Ассоциациясига тўқимачилик саноатининг барча корхона ва ташкилотлари аъзо бўлиши мумкин. Бу маҳаллий ишлаб чиқарувчилар учун қатор афзалликларни тақдим этади. Жумладан, "Ўзтўқимачиликсаноат" Ассоциациясига аъзо корхоналар импорт қилаётган пахта, сунъий ва синтетик тола, жун, хомашё ҳамда тўқимачилик маҳсулотларини чиқариш учун зарур бўлган ва республикада ишлаб чиқарилмайдиган бошқа материаллар учун божхона тўловларини тўлашдан озод қилинади (божхона ҳужжатларини расмийлаштириш йиғимларидан ташқари). 

Бундан ташқари, "Ўзтўқимачиликсаноат" Ассоциациясига ўз аъзоларининг манфаатларида даъво киритиш, давлат органлари ва бошқа ташкилотлар қарорлари, суд жараёнида мансабдор шахсларнинг ҳаракатлари юзасидан давлат божини тўламасдан шикоят аризаларини узатиш ҳуқуқи тақдим этилган. 

Шунингдек, матбуот анжуманида кластерлар яратилиши тўқимачилик саноатини янада ривожланишининг энг самарали шаклларидан бирига айланиши алоҳида таъкидланди. Мазкур модель пахта етиштириш, унга бирламчи ишлов бериш, сўнг пахта тозалаш корхоналарида қайта ишлаш ва юқори қўшимча қийматга эга бўлган тайёр тўқимачилик маҳсулоти ишлаб чиқаришдан иборат бўлган ягона ишлаб чиқариш даврини яратишни назарда тутади. Ушбу вазифадан келиб чиқиб, Навоий вилоятида ташкил этилган тажриба-синов натижаларини ҳисобга олган ҳолда, ўрта муддатли истиқболда пахта-тўқимачилик кластерларини ривожлантириш Концепциясининг лойиҳаси ишлаб чиқилмоқда.