Испанияда йил сўзи танланди

2017 йилда Испанияда йил сўзи сифатида “апорофобия” атамаси танланди. Бу сўз ночорлик ва ночорлар олдидаги қўрқувни англатади. Бу сўзни испан тилининг оммавий ахборот воситаларида қоидали қўлланишига кўмак берувчи Fundéu жамғармаси мутахассислари танлашди.

Йил сўзи бўлиш учун “финалчилар” қаторидан “туризмофобия” (сайёҳларга салбий муносабат), machoexplicación (“мачо” ва “тушунтириш” сўзидан ташкил топган, менсплейнинг сўзининг муқобили; mansplaining – эркакнинг аёл билан илтифотли гаплашиши), “ёлғон хабарлар” (noticias falsas) сўзлари ҳам ўрин олган.

“Апорофобия” атамасини илк бор ўз мақолаларида испан файласуфи Адела Кортина 1990-йилларда қўллаган. Кўпинча ксенофобия ва ирқчилик ортида одамларни миллий ва ирқий аломатларга кўра ёқтирмаслик, муҳожирларга нафрат эмас, балки бошқа бир ҳолат – ночорликни хуш кўрмаслик ётади. Бу атама Испания қироллик академиясининг луғатига киритилган.

Жамғарма 5 йилдан бери йил сўзини танлаб келади. 2013 йилда йил сўзи escrache сўзи бўлган. Бу сўз бирор кишига қарши у бўлган жойда (уйда, ишда) норозилик намойишини ўтказишни англатади. 2014 йилда “селфи”, 2015 йилда “қочқин”, 2016 йилда “популизм” сўзлари йил сўзлари сифатида эътироф этилганди.  

Испан тили 470 млн киши учун она тили ҳисобланади. У бу борада хитой тилидан кейин иккинчи ўринни эгаллайди.