Испания ва Аргентина йил тўқнашувига қандай тайёрланмоқда

Кўча экранлари, барлардаги чегирмалар ва кучайтирилган хавфсизлик чоралари — Испания ва Аргентина шаҳарлари жаҳон чемпионати финалига тайёргарлик кўрмоқда. Икки давлат миллий жамоалари ўртасидаги баҳс Ню-Йоркда 20 июл куни соат 00:00да бошланади.

Сунъий интеллект яратган сурат

Испан ОАВнинг ёзишича, бутун Мадрид улкан фан-зонага айланиб бўлди. Шаҳар ҳокимияти одамлар оқимини турли ҳудудларга олдиндан тақсимлашга уринмоқда ва экранларни бир-биридан узоқ масофаларга ўрнатмоқда. Полиция хавфсизликни таъминлаш учун махсус ҳаракатлар режасини ишлаб чиқмоқда. Мамлакатнинг бошқа шаҳарларида ҳам финалга шу тарзда тайёргарлик кўрилмоқда.

Барселонада баҳс катта майдонларда трансляция қилинади. Шунингдек, «Барселона» клуби стадиони бўлмиш Camp Nou яқинида ҳам улкан экран ўрнатилади.

Испания бош вазири Педро Санчес финални томоша қилиш учун Ню-Йоркка учиши маълум қилинган.

Аргентина президенти Хавиер Милей «ирим» қилиб АҚШга бормаслигини айтди. У финал баҳсини бошқа барча ўйинларни қаерда томоша қилган бўлса, ўша ерда кўришини билдирди. Шунингдек, Милей бир ойдан ошиқ вақтдан буён ирим қилиб битта курткада юрганини айтди. Айтишларича, финал куни кўплаб компаниялар, дўконлар ва муассасалар вақтинча ишламайди.

19 июл куни соат 02:00 да инглизлар ва французлар учинчи ўрин учун курашишади. АҚШнинг барча федерал хизматлари ходимлари Майамидаги матч хавфсизлигини таъминлашади. Айни пайтда ФҚБ, иммиграция хизмати, махфий хизматларнинг барча кучлари ушбу тадбирга жалб этилган.

Финалдан бир неча кун олдин ижтимоий тармоқларда бундан 19 йил илгари олинган, Лионел Месси Испания миллий жамоасининг ҳозирги аъзоси Ламин Ямални чўмилтираётгани акс этган фотосурат тарқалди. Улар эртага илк бор майдонда бир-бирлари билан тўқнаш келишади.