Фоизлар бўйича компенсация ва кафилликни расмийлаштириш механизмлари жадаллаштирилди

Вазирлар Маҳкамасининг 15.01.2018 йилдаги 26-сон қарори билан   Ўзбекистон Республикаси Вазирлар Маҳкамаси ҳузуридаги Тадбиркорлик фаолиятини ривожлантиришни қўллаб-қувватлаш давлат жамғармаси тўғрисидаги низомга ўзгартириш ва қўшимчалар киритилди (кейинги ўринларда – Жамғарма). Бу ҳақда Norma.uz хабар бермоқда.

Эслатиб ўтамиз, Жамғарма президентнинг 17.08.2017 йилдаги ПҚ-3225-сон қарори билан ташкил этилган. Унинг асосий вазифаси – кичик тадбиркорлик субъектларига молиявий ёрдам кўрсатиш.

Жамғарма томонидан улар бўйича кичик тадбиркорлик субъектларига кафиллик ва фоизлар бўйича харажатларга компенсация тақдим этиладиган кредитларнинг чегараланган суммаси энди сўмда белгиланади.

Шу билан бирга молиявий ёрдам олиш таомилининг алоҳида босқичлари муддатлари камайтирилди. Хусусан, Жамғарма компенсация ва кафиллик олиш бўйича банкдан келиб тушган ҳужжатларни 3 иш куни мобайнида ўрганади (илгари кредитлар бўйича фоизларни қоплаш учун ҳужжатлар 7 кун, кафиллик олиш бўйича эса 10 кун текширилар эди). Умуман олганда, молиявий ёрдам кўрсатиш бўйича шартнома тузилгунга қадар барча тадбирларнинг умумий муддати камайтирилди:

• компенсация олиш учун – 1 ҳафтага;
• кафиллик олиш учун –  10 кунга.

Ҳужжат 17.01.2018 йилдан кучга кирди.