Қозоғистон ва Қирғизистон билан чегарада километрлик навбатлар пайдо бўлган 

Ўзбекистон – Қозоғистон чегарасидаги «Жибек Жолу» («Ғишт-Кўприк» - «Черняевка») назорат-ўтказиш пунктида сўнгги уч кунда яна одамларнинг километрлик навбатлари кузатилмоқда. Бу ҳақда чегарани 24 январь куни кесиб ўтган фуқаролар хабар беришган.

«Юзлаб одамлар чегарада соатлаб туришга мажбур. Узундан-узун навбатлар Қозоғистон томони кишиларни жуда секинлик билан ўтказаётгани туфайли пайдо бўлди. Менинг ўзим бу навбатда бир соатдан ортиқроқ турдим», - дея хабар қилган ўзбекистонликлардан бири.

Шу билан бирга, Ўзбекистон – Қирғизистон чегарасида ҳам шундай вазият юз бераётгани айтилади. Фуқаролардан бирининг 24 январда хабар беришича, Ўзбекистон – Қирғизистон чегарасидаги «Дўстлик» назорат-ўтказиш пунктида ҳам узун навбатлар пайдо бўлган.

«Кечаси соат 2:30да чегарага келган одамлар Қирғизистон ҳудудига ҳаттоки 17:00да ҳам кира олишмади. Аскарлар чегарани ёпиб қўйди. Минглаб одамлар совуқда турибди», - дея ёзган фуқаролардан бири.

Эслатиб ўтамиз, Қирғизистон – Ўзбекистон чегарасидаги «Дўстлик» назорат-ўтказиш пункти ўтган йилнинг сентябрида икки томонлама очилганди.