Нурсултон Назарбоев: Тезроқ ҳаракат қилишимиз керак

Қозоғистон президенти Нурсултон Назарбоев “Нур Отан” партияси олдида турган вазифалар ҳақида гапирди, деб хабар қилмоқда Оқўрда матбуот хизмати.

"Нур Отан" партияси давлатнинг муҳим сиёсий кучига айланди, у сиёсатни белгиламоқда. Партия бизнинг барча дастурларни амалга ошириш жараёнида иштирок этмоқда", - дея айтиб ўтди Қозоғистон президенти.

Матбуот хизматидан таъкидлашларича, Нурсултон Назарбоев барча давлат ҳамда соҳавий дастурларни сифатли амалга ошириш ҳамда бу борадаги назоратни кучайтириш муҳимлигини қайд этган. Давлат раҳбари миллий иқтисодиёт тўртинчи саноат инқилоби шароитларига мослашиши зарурлигини таъкидлаган.

"Агарда биз жаҳондаги тараққиётдан орқада қолишни истамасак, унда тезроқ ҳаракат қилишимиз керак. Шунинг учун бу йилги мурожаатнома ҳам ислоҳотларни амалга оширишга йўналтирилди. Бизнинг аввалги барча дастурларимиз шунга қаратилганди. Гап уларнинг қандай ишлаётганида. Биз экспорт маҳсулотини ишлаб чиқарадиган корхоналар қуришимиз даркор", - дея айтиб ўтди Қозоғистон президенти.