Ёш баскетболчининг охирги сониядаги тўп ташлаши уни АҚШ юлдузига айлантирди (видео)

АҚШнинг Иллинойс штатидаги мактаблардан бирининг ўқувчиси Блейк Питерс баскетбол учрашуви вақтида ўйиннинг охирги сониясида бутун майдон узра рақиб жамоа саватчасига тўпни бехато ташлаб, ўз жамоасига ғалаба олиб келгандан кейин маҳаллий юлдузга айланди. Ўсмирнинг саватчани бехато “пойлаши” видеоси YouTube’да оммалашиб кетди.

Ўсмирнинг Evanston Township жамоаси Maine South жамоасига қарши финал учрашувнинг охирги сонияларида 44:42 ҳисобида ютқазаётган эди. Боз устига, рақиб жамоа ўсмир жамоаси майдонида жарима тўпларини амалга ошираётган бўлган. Рақиб жамоа ўйинчиси саватчага тўпни тушира олмагандан кейин, тўп Питерснинг қўлига келиб тушади. Шунда ўсмир ҳеч иккиланмай тўпни ўз майдонидан туриб, ўйин тугаши ҳақидаги сигнал янгаришидан олдин рақиб саватчаси томон улоқтиришга улгуради ва не ажабки, уни саватчага бехато йўллай олади. 

Шундан кейин залда бўлган деярли барча ўз ҳаяжонини ушлай олмай, бундай вазиятдан ақл озгудек бўлган. Чикаго ОАВ томондан “афсона” деб номланаётган 15 ёшли Питерс WHNT19 News каналига берган интервьюсида “ўз зиммасига бундай жавобгарликни олишни истамагани” ва тўп унинг қўлига келиб тушишидан қўрққанини айтган.          

“Четдан ҳаммаси ёмонмасдек туюлади. Мен саватчага туша олганимда, шокда эдим. Бу эҳтимол ҳаётимдаги энг яхши он бўлса керак”, деб айтган ўсмир. Питерснинг айтишича, у бу “тўп ташлаши”дан кейин ўзига бўлган эътибордан уч кун ухлай олмаган. Жумладан, уни Эванстон шаҳри мэри ҳам табриклаб, 29 январни “Блейк Питерс куни” деб эълон қилган.

Ўсмирнинг айтишича, у барчаси тезроқ ўз изига қайтишини истамоқда. “Барча тинчланишини интиқлик билан кутмоқдаман”, деб айтган бундай “эътибордан” гангиб қолган ўсмир.

Питерс коллежда ҳам баскетбол ўйнашга тайёрлигини, бироқ Миллий баскетбол уюшмасида карьера қилишни ўйламаётганини айтган. “Менга ҳуқуқшунослик ёқади ва эҳтимол, мен у билан шуғуллансам керак”, деб қўшимча қилган йигитча.