Германия баскетбол терма жамоаси 14 сентябр, якшанба куни Ригада ўтказилган мусобақанинг финал учрашувида Туркиядан келган рақибларини 88:83 ҳисобида мағлуб этиб, Европа чемпиони бўлди. Икки йил аввал Маниладаги чемпионатда немислар баскетбол бўйича жаҳон чемпионига ҳам айланган эди.
Германия жамоаси иккинчи марта баскетбол бўйича Европа чемпиони бўлди. Улар бу номни биринчи марта 1993 йилда қўлга киритган. «Германия баскетбол бўйича жаҳон ва Европа чемпиони. Биз айнан ўзимизга тегишли жойдамиз — ва уйда ҳали ҳам бир неча жуда яхши ўйинчилар бор», — деди NBA'нинг германиялик юлдузи Франц Вагнер ғалабани шарҳлар экан.
Ҳал қилувчи очколарни сўнгги дақиқада Германия терма жамоаси сардори Деннис Шрёдер киритди. Кейинчалик у учрашувнинг энг яхши ўйинчиси деб топилди.
